【專訪林峯、吳林峰】企係台上嘅滿足感驅使我仲想做音樂
熟悉林峯經典歌曲嘅聽眾，當然知道如鄧志偉、莊冬昕等班底。包含今次新歌 #無傷大雅
在內，近年不時同新人合作，源自做歌嘅模式已經唔同。
「以前為咗演唱會儲夠歌，比較密集做歌。做新歌要諗埋演唱會需要咩舞台效果，好有目的收歌。每年出碟有少少似完成功課，最保險就係搵熟悉嘅音樂人。而家我想摸索自己仲有咩有能力嘗試嘅風格，想挑戰每一個唱作人嘅特色，同埋屬於佢哋風格底下，到底會寫咩歌俾我？」
與吳林峰（下稱：吳）合作嘅因由，確實源於名字。「同名已經係一個緣份。我再去聽發現，佢寫嘅歌好有自己嘅風格，就問華納同事，有冇可能搵吳林峰幫我寫歌？」
◤ 擔心 林峯 x 吳林峰 淪為噱頭 ◢
寫歌俾林峯，吳直言曾經擔心只係宣傳伎倆：「我只不過係作曲人，只係希望寫到一首好歌幫到歌手。我初初都唔想一齊做訪問，專注喺佢身上好啲。但有機會講，我都想大家先放低，『吳林峰寫俾林峯』呢個位，當林峯分享佢唱嘅過程點摸索唔熟悉嘅旋律，先係好玩嘅地方。大家應該聽新歌有咩地方，係你以前冇聽過嘅林峯。我滿足自己嘅 fantasy，大家都可以有呢個滿足。唔好理邊個寫，就係呢首歌，我覺得林峯好型，真係好型。」
細心聽眾會留意到，backing vocal 都係吳負責，佢用「年度大事回顧」嚟形容：「佢開始唱『人去樓空』，嗰下啲雞皮已經起到冇辦法思考。有好多畫面喺度飛，佢講『寡人』，坐喺火車郁緊，唱幼稚完，係回憶翻曬嚟嗰種。」
◤ 討厭庸俗情歌？ ◢
香港樂壇近年轉變大，林峯亦觀察到香港聽眾可以聽到好多新嘢。「近呢5年，包容大咗，聽眾更加識聽，要求多咗。因為有人鍾意聽，激勵到音樂人可以放開手腳，玩以前一路想玩嘅類型。我絕對想繼續嘗試多啲，但唔可以太天馬行空，始終每個歌手有自己嘅能力範圍、聲音特質，要考慮自己可唔可以做到。」
提到林峯嘅聲音特質，聽眾當然會被佢嘅情歌吸引。新歌填詞人林寶提到「好像世界愈來愈不喜歡情歌 認為談情說愛好庸俗」，林峯對情歌亦有自己嘅見解。
「情歌範圍好大，有好多種情。我哋都有討論，認為情歌係一個最容易令接觸嘅聽眾產生共鳴、投入一首歌嘅途徑。每首情歌講嘅故事唔同，表面包裝可能係情歌，但入邊可能講緊人生哲理。」
以無傷大雅為例，林峯表示聽呢首歌出現嘅畫面，唔一定係以往嘅感情事。「可能係最近發生嘅瑣碎事、回想你成長嘅過程，首歌只不過係觸發你後面，屬於自己嘅延續、感受。我曾經都有段時間有少少覺得，又係情歌？但諗深一層，尤其近年，情歌類型有好多，曲風都唔同，亦包含咗好多唔同嘅情。」
吳亦同意，可能大家討厭嘅只係曲式。「我以前好憎魚蛋歌，但一位前輩講，『你寫首好聽嘅魚蛋歌嚟聽下』，你就會明，寫一首可以20年都識唱嘅魚蛋歌，好難。情歌只不過係一個切入。大家討厭嘅係，當你聽十首千篇一律嘅，純粹份詞唔同啲，就會覺得煩厭。但而家咩都有得聽，實搵到你喜歡嘅，最怕冇得揀。」
◤ 演唱會先有 好集中嘅滿足感 ◢
時間回到2016年，林峯逐漸淡出樂壇，坦言喺音樂上覺得要聽一停。「之前太密集地做音樂，我好似未諗到有咩新火花。就先將手頭上演員工作做好，以免兩頭唔到岸。」
但唱歌喺林峯心入面，依然擁有無可取締嘅位置：「做演員最大嘅滿足感，係你塑造到一個角色，觀眾街坊記得。歌手最大嘅滿足感，就係企喺舞台上面。歌手最終個目標就係做演唱會。入場嘅人，真係為咗你一個人買飛入去睇，唔會好似電影，可能因為唔同原因入場。」
「演唱會需要好好嘅團隊先成事，但喺舞台上，主角係你。我睇演唱會，唔會話因為排舞，因為服裝嚟，唔會，你就係因為歌手嚟。作為歌手先可以體會到嗰份好集中嘅滿足感，呢個驅使我，仲好想繼續做音樂。」
演唱會對林峯而言係最好嘅方法，回饋支持自己嘅人。「唔會話我出隻歌送畀你哋，唔係，真正要奉獻，就係喺舞台上表現畀佢哋睇。當刻你同佢真係近距離接觸，直接回饋俾畀佢，呢個係我繼續想做事。」
◤ 演唱會就係唱好啲歌、跳好啲舞 ◢
林峯嘅偶像張學友，啱啱完成多場演唱會，無數人都會好奇，幾時到你？「目標係年底。我過往做演唱會都比較倉卒，但每年必然重新做一個唔同嘅作品。何況而家停咗幾年，冇可能因為疫情過去，即刻將以前嘅嘢翻炒，為開演唱會而開。既然要做，就由零開始創作。所以今年會收多啲歌。」
過去8年間5度登上紅館，觀眾能夠想像到嘅典型演唱會環節，林峯早已試過不止一次。以前經常有人問林峯，演唱會打算「玩」咩？林峯直言希望大家唔好將重心擺喺度。
「呢啲係輔助，演唱會咪唱歌、跳舞，嗰時成日講到好似雜技團。演唱會，你就係睇人哋嘅舞台設計、服裝、燈光、主題，想帶俾你咩感覺，唔好將個重點擺喺，你會玩火定水？唔知，最緊要我入到去，做好歌手要做嘅嘢，唱好啲歌、跳好啲舞，用最佳狀態展現我最好嘅一面俾大家睇，先最重要。」
過去披星戴月地工作嘅林峯，到2016年有更多時間，選擇嘅係思考自己唱歌上嘅可能性。譬如揀歌方面，當年聽多咗外國嘅 Demo，花時間喺錄音揣摩唱法。呢幾年音樂上比較少曝光嘅時候，林峯有冇吸收咗唔同嘅養分？
「我呢幾年突然對跳舞產生更大興趣，好想試下自己，仲得唔得？同時香港仲有一啲類型嘅歌係少出現，譬如 Chris Brown 嘅 Under the Influence 呢種，慢嘅、up beat、sexy嘅。當然要適合自己，但我好鍾意呢啲，仲有好多想嘗試。」
◤ 學識自己消化 ◢
近年大家對林峯嘅印象同以往大相徑庭。以往批評聲音此起彼落。甚至林峯在首奪亞太區最受歡迎男歌手亦認為受之有愧，不會將獎座擺出嚟，留待自覺實至名歸嘅一刻。如今許多人高呼「掛住林峯」，林峯會點睇呢個轉變？
「好多謝大家。每行有自己嘅規矩、制度，我只不過係小小嘅演員，歌手，嗰陣好多嘢唔到我控制。我係幕前，一定會被評論，一係匿埋喺房唔好出嚟。如果因為一樣嘢，心情容易受到影響，手頭上其他嘢係咪唔使做？冇得停，以前有好多聲音，係要自己平衡心理。」
林峯明言或者係以前演員訓練出嚟嘅優勢。「我哋都係正常人，自己生活有好多瑣碎事，但每日都要拍十幾二十個鐘，上一場喊，下一場要哈哈大笑，人會癲。你就要識得自己消化、自己平衡。我就係轉移視線，冇嘢啊，我仲有機會繼續做自己熱愛嘅嘢，已經好幸福，所以冇所謂嘅。」
Special thanks to
@warnermusichk @lam_fung_official @ntl.fung
想睇更多同類型文章：https://www.instagram.com/besidesmusichk/
支持 Besides：https://www.buymeacoffee.com/besidesmusic
樂迷投稿：https://docs.google.com/forms/d/e/1FAIpQLSeXQhj2bTugDRTnF2-HkOwemGjHSm9OYGqwn5NBeAWhT1VU-w/viewform
留言 2