鍾培生反駁影響莊雅婷仕途　「我結婚關你叉事呀？」

現年35歲的鍾培生於3月初於社交平台出片，宣布向女友莊雅婷（Angel）求婚成功。鍾培生在淺水灣大宅內從30米高空吊威也一躍而下，雖然被不少網民直指「非常中二病」、「好kam」……不過女主角莊雅婷就非常受落，直言：「又真係幾型嘅」。不過，最近有專欄引述「建制中人」意見，認為莊雅婷損害公職人員的形象，又質疑莊雅婷的從政誠意，對她作出「溫馨提示」，提醒要履行好區議員職務。

對於作為西貢區委任區議員的未婚妻被指訂婚影響仕途，鍾培生昨晚（3月11日）出片反擊，帖文寫道︰「我會愛你、保護你、照顧你一生一世。」他在片中怒斥某傳媒的報道有引導性：「話Angel嘅工作因為同我訂婚有機會停止，話係嚴重損害公職人員嘅形象，從政誠意被質疑，咁內文呢基本上都係垃圾㗎喇。」報道指莊雅婷選港姐影響公職人員形象，但鍾培生指有幾位前香港小姐是全國政協委員和全國人大代表。他直認自己的言論出位，但完全是基於愛國愛港的香港市民身份出發，又提到全家都是愛國愛港的商人，自己也有擔任公職，為香港、國家作出貢獻。

鍾培生說道︰「我哋屋企捐贈好多嘢返去內地，起隧道、醫院同學校，我嫲嫲個阿哥都係烈士，我完全睇唔到有乜嘢影響形象、誠信相關嘅嘢！加上我結婚即係訂婚係閉門屋企搞，區議員、公職人員唔可以結婚㗎咩？我又冇請你嚟！啲人鍾意講同我結婚關我叉事呀？」最後，他要求該傳媒「同公眾釐清返個事實，點解要中傷我同Angel，我亦都保持呢個法律追究嘅權利！」

鍾培生未婚妻莊雅婷（Angel）現年25歲，於2000年香港出生，曾於北京大學完成本科雙學位，其後於香港大學進修碩士課程，時任保安局局長鄧炳強曾表示莊雅婷當年就讀北京大學是「棄暗投明」。莊雅婷為青年民建聯副主席，亦是現任西貢區議會委任議員，是香港本屆最年輕的區議員。去年6月曾參選香港小姐並被捧為大熱，但莊雅婷之後在社交平台宣布退選。