王嘉爾任姜濤個唱嘉賓壓力大　遭嘟姐Unfollow表示掛念

藝人王嘉爾(Jackson Wang)今日現身金鐘出席自家品牌TEAM WANG DESIGN活動，近千粉絲一早帶定應援牌到場支持，逼爆兩層商場，場面墟冚。Jackson出場時，全場尖叫聲震耳欲聾。Jackson先到兩個粉絲位置作90度鞠躬，又合十同記者講辛苦晒，及罕有派心。

Jackson表示已經6年冇返香港，很想遊新界去體院及沙田馬鞍山嘆美食，之前去食九記，由上環行去中環又搭船過海，享受漫無目四圍行，「依家仲有冇潮流特區和金雞？暴露咗年紀添！」見到粉絲有返屋企的感覺，透露23號便離港，聖誕將會工作中渡過。他透露2026年將會開啟北美和南美演唱會，將會帶兩位歌手一同前往，想保持驚喜，所以不透露歌手身份，總之是好朋友，及會推出中文專輯，一定會有廣東歌；2027年就會展開亞洲演唱會。表示想同香港的音樂人合作，「睇佢哋公司有冇良心，如果唔係我就破產。」

早前擔任姜濤演唱會首場嘉賓，Jackson稱呼姜濤是姜濤老師，表示上到台壓力比姜濤更大，「有啲緊張，起雞皮。」綵排時好開心，台上姜濤反過來扶一扶他作打氣，感覺好溫暖。他說與姜濤在綵排時才真正見面，問見真人有沒有落差？他客氣表示並沒有預期甚麽。又透露24歲時在韓國認識Anson Lo。

Jackson同姜濤一直是網友關係，問到之前為何私訊鼓勵姜濤？Jackson說：「做呢行唔易，想將經驗分享畀佢，唔係教唔係開導，想分享一句：『No one gonna care about you but only yourself』，只有愛你嘅人、粉絲、屋企人和朋友陪住渡過風風雨雨高高低低。我睇到出面好多報道，自己有內幕消息，無論真定假好好想同佢分享。」認為甚麽事總會捱得過，各行各業都有壓力，藝人行業的壓力也不少，需要搵發洩出口。表示待姜濤演唱會完後再約食飯，將來自己開騷，若找姜做嘉賓，笑言不止唱兩，要姜濤唱8首。

提到鄭裕玲(嘟姐）社交網unfollow 他，Jackson覺得是她私隱，無特別問，稱嘟姐是傳奇前輩，又對着鏡頭說miss you表示掛念。之前接受黎芷珊訪問講及生理需要會「自己解決」，他表示不明白為何大家如此驚訝，「I‘m just me，我是我。」認為夜生活並非壞事，不應被誤解。由於哥哥有個女兒所以屋企人沒有催婚，但透露希望35歲前能結婚生小孩，對象無年齡或國籍條件，只需要是人，若拍拖被撞到會認，會否一見鍾情？笑言如果對方令他一見鍾情應該相當有料到。

東網網站 : https://on.cc/東網Facebook專頁 : https://www.facebook.com/onccnews/