楊焉Carol被租場學生索償8萬　「我好似遇到碰瓷黨」

「浸大Carol」楊焉（前名楊梓瑤）曾任模特兒而入行，並於電影《婚前試愛》擔任第二女主角。2014年，Carol淡出演藝圈，轉型成為瑜伽教練，2021年誕下一子。2024年於餐廳拍片做pull up（引體上升）challenge時不慎滑手倒手，意外倒地致C4和C5（頸椎第四與第五節）移位。最後需要入院接受手術。Carol近日在社交平台發帖文表示「我好似遇到碰瓷黨」，她透露於年廿九收到一封掛號律師信，聲稱有人於2025年在其studio被跌落的掛架撞傷頭部，要求「心靈補償要5萬、件事要claim 8萬。」

Carol發長文寫道：「想問問大家有無人有同樣經歷⋯⋯我好似遇到碰瓷黨 ⋯⋯廿九收掛號律師信。話說上年10尾既（嘅）某一日返到studio見到掛衫架同埋廁紙架都爛咗，完全唔知發生過啲咩事，一星期後嗰租場老師同我講個學生發生咗意外整親個頭，廁所個掛衫架唔夠力，個學生成個袋跌咗落嚟揼中自己個頭，然後話準備告我地⋯⋯？當然既（嘅）我正值悲傷時期，身體仍然恢復中，事發當日人不在香港，除咗見到廁所嘅嘢爛咗之外，當時老師是（事）後都冇再update我，所以完全忘記咗同保險公司講。」

Carol透露事主要求「claim 8萬元」：「租場老師話個男學生掛咗個好重嘅袋上個勾到（事後老師有幫佢攞起個袋所以佢都覺得個袋好重）。係（喺）廁所既（嘅）勾係一個普通嘅勾用黎比（畀）人換衫時用，上面都貼咗不能承重不能掛袋，Studio嘅告示板都貼咗自己要照顧自己安全。而我哋大概有20個locker，成個studio有咁大嘅空間佢唔放要掛上去一個掛衫架度⋯⋯當時佢律師女朋友都在場，就係呢位女朋友律師機掛號信俾我哋，send埋佢車費醫生費連埋條友既ID，心靈補償要5萬、件事要claim 8萬。」

Carol就事件公開詢問意見：「chi L sin上網睇過間律師行嘅website乜都做幫人申訴公義有為民請命，但係喺度蝦小店，牛高馬大標語告示唔睇俾自己掛上去個袋揼中自己個頭整爛人哋啲嘢，反過嚟告返我地（哋）請問大家有冇呢個經歷？點樣部署？係咪嗰啲夾埋同一個醫生律師係咁claim嗰啲無賴？」有網民提議「報東張」、有人建議諮詢律師，Carol表示新年後會諮詢律師意見。