黃妍抒情新作化身《悲劇女主》　道出一段關係走往終結之過程

《悲劇女主》黃妍

黃妍抒情新作讓大家化身《悲劇女主》，道出一段關係走往終結之過程，令人心酸。

「眼睜開 眉目無法按耐 脫軌的愛 留低你 能改的我都改」

當察覺到愛人與自己漸行漸遠，彼此再不同步時，嗰份衝擊確實難以接受。不惜用盡一切方法，甚至改變自己，都想迎合對方，就係為咗愛人一絲回心轉意嘅可能。

「講一句 就落淚 太在意的我 一起各樣避忌 配合你的我」

明明內心傷痛得快要窒息，卻只可默然接受，就好似每部悲劇女主角一樣，終日與眼淚為伴。心中知道講一句分手就可以得到解脫，仍甘願喺分分合合之循環中掙扎，最少愛人依然在旁。愛情就係會令人變得盲目，多痛都不願放手。

可惜當一個人嘅心決意離去，你付出多少都無法逆轉，殘酷卻寫實。

「分手告別受罪 我沒有講破 我未能 好好心息所以我想 很想你放過」

喺崩潰失望過無數次後，終會頓然醒覺，與其一直做無人關心嘅悲劇女主，倒不如勇敢一次，放開依段感情，放過自己。說到底，其實你只係放唔低曾經快樂嘅過去，就算依段關係無法開花結果，最少曾經燦爛過，愛人前必先自愛。

「終於我越墮落 我越看清楚 我未能 好好呼吸 所以我想 好好放開我」

黃妍一向唔多悲情作，但每首我都相當喜歡，佢溫柔嘅聲線，總可以為樂迷心靈送上一點安慰與溫暖。今次配上Serrini一如既往貼地揪心嘅詞，譜寫出一個淡然傷感故事，非常襟聽。

《悲劇女主》以外，一眾sony歌手最近推出以情歌為題嘅企劃《Always Need Love Songs》，概念有趣又特別，大家可以密切留意！

「好好愛我 成熟得多 望穿把戲 原來不要躲 愛過」

最後，希望大家都有擺脫做悲劇女主嘅勇氣，瀟灑演一齣屬於你嘅甜蜜愛情劇💕

《悲劇女主》黃妍
曲 : Y.Siu / KW朱敏希
詞 : 梁嘉茵
編 : Y.Siu @ emp / KW朱敏希
監 : Edward Chan / Y.Siu @ emp / KW朱敏希

「講一句 就落淚 太在意的我
一起各樣避忌 配合你的我
我想過分手 不怯懦
又哭過再言和
太多往事 纏繞太過
繼續 很錯

一想你 就落淚 太大意的我
一起慣活受罪這爛透的我
我不過分手 都怯懦
又心軟到言和
你都繼續殘忍 對我」

▼Follow hkpopculturelover
Instagram: https://www.instagram.com/hkpopculturelover/