【觀後感】陳健安 Live afteR Life 2024演唱會

期待以久，安仔終於舉辦第一個實體演唱會，主題性強，以尋找痛苦背後既意義為題，為樂迷帶嚟完美一夜。
（我睇2/3尾二場）

「Wo 離別未等於貪新厭舊 Wo 離別為碰見更大宇宙」

開場先用三首平靜溫柔作品，富感情地為大家帶嚟舒服既聽覺享受。再緊接幾首玩味快歌，全場一齊玩一齊un，享受依場創作者的派對。

「我可為你墮落 而你只是更冷漠」

快樂過後，安仔將自己三首相當特別既情歌串連，沉重地演繹愛情之苦。由《厭惡物圖鑑》苦戀虐心；《時光邊緣的人》道出長生不老之人縱使見盡愛情緣來緣盡，依然求一份愛；到《在錯誤的宇宙尋找愛》唱出禁忌之戀所面對既矛盾，中間加入和音更好似唱曬雙方心聲，非常動人，愛情彷彿喺夢中先可以如願。

「我的愛全被接收 必須再重頭禪修 練到清心寡愛 無懼色誘」

及後安仔用幾首輕鬆作品緩和氣氛。《雷公》同iii舞台上既配合相當有趣，有種音樂劇感覺；再以《廢學》躺平地唱出懶理世界既人生哲學。

「同途行 踏踏步 靠勇氣 抗衰老」

心情稍為平復後，族長就帶大家回到青蔥歲月。時光飛逝，望住畫面上一班學生天真既笑容，簡單又熟悉既互動，回憶頓時湧出，非常感動。原來我已經唔再係當初既少年，但慶幸依然保持初心，做到想得出就做，心境未老。

「一路走著 一路走在生命之中 一直失望 一樣不斷希望之中」

最後，演唱會以一趟心靈之旅作結。即使生活遇到任何困難、痛苦也好，總會有安仔作品相伴，與你負重前行，探索生命既未知，一步步尋找人生意義。每次欣賞依幾首歌都會對生活多咗份希望，彷似獲得重生，有力量繼續面對各種挑戰。
「我始終掛住這個你 無停下過 在腦海中進退 就似 回聲」

演唱會rundown編排出色，將安仔既作品組成不同章節，cover作亦揀得合適，Oscar應記一功！Visual非常多樣化，令歌曲更有畫面，我特別喜歡《重生》用海浪配上輕柔既結他同歌聲，內心感到一片平靜舒適。

「但無悔是有 這天 一刻的冀盼」

今次係我第一次聽安仔現場，唱功簡直無可挑剔，力量柔情兼備，比CD版更能將歌詞意義唱入內心。而令我最深刻係《好好掛住》，直頭聽到起曬雞皮。

好難得睇到一個故事性咁重，令人產生咁多情感既演唱會。雖然部分作品背後故事有點傷感，或者會勾起痛苦回憶，但虐心後又會以音樂溫暖地療癒大家，依個就係安仔歌聲既威力。

「天空宇宙放棄我 同路行的你 未會丟低我」

由CAS時期認識族長，一路睇住佢成長，到今日已經成為成熟又獨當一面既歌手。作品充滿個人特色，明明題材未必係最新鮮，但佢就係能夠唱出另一種味道，相當吸引。好開心安仔開始比廣大樂迷欣賞，佢絕對值得更多，期待快啲再喺舞台相見！

片一：《告別的藝術》

片二：《厭惡物圖鑑》

片三：《在錯誤的宇宙尋找愛》

片四：《雷公》with iii

片五：《仍然是那個少年》

片六：《重生》

片七：《未知道》

片八：《繼續繼續》

片九：《好好掛住》

▼Follow hkpopculturelover
Instagram: https://www.instagram.com/hkpopculturelover/