林芊妤自爆被的士司機誣捏　老公被指：成頂綠帽都戴晒

林芊妤(Coffee)懷了第二胎，早前胎兒疑似染色體有異常，慶幸詳細檢查後顯示胎兒正常。她日前就上網台「SpotiTalk」和梁靖琪傾談育兒心得及感情事，當中就自爆一次搭的士經歷，令她和老公發生爭執。

林芊妤分享了多年前一次搭的士經歷，指當時她和老公正在傾談一位朋友的女朋友出軌，而沒有認出Coffee的司機竟然搭嘴提到自己：「之後個司機就喺度講：『個Coffee咪又係，上個禮拜先車佢，同個有錢佬去酒店！』嗰時可能係夜晚，佢認唔到。我嗰時喺度諗，究竟應唔應佢好呢？究竟件事係邊度嚟呢？定係其實佢認錯人？佢又係講：『佢老公咪又係勁，成頂綠帽都戴晒。』」之後回到家更被老公責罵：「我老公直頭係鬧我，話：『我唔覺得你可以保護到你個仔。』我覺得佢講得啱，如果我咁軟弱，『我可以同你一齊承受呢啲是非，但係你個仔，佢遲啲喺香港讀書，總會遇到一啲人badmouth你。如果你都唔識幫自己講說話，你個仔點樣捍衛自己呢？你自己都保護唔到自己，點保護個仔？』佢講到呢句我即刻流眼淚。」