娛圈單打︱戰鬥格贏盡讚賞　靠自己扳回一城

喂，港姐決賽爭妍鬥麗就梗㗎啦，但唔止台上精彩，台下同樣春光無限，當中尤以師姐馮盈盈最搏殺，以低胸、露背、中間透視嘅金色戰衣上陣，艷壓全場。網民大讚FYY索到痹，就算依家先至參選，一樣贏硬有餘！

咁又係噃，今屆佳麗雖然被譽為質素最平均嘅一屆，但網民對三甲人選議論紛紛，唔少人覺得五強之中，最唔靚嘅就係呢三個，偏偏攞獎，令人𢱑頭！反觀FYY就毫無爭議，靚絕電視城，性感火辣，睇到觀眾嘩嘩聲！

嗱，前冠軍陳曉華本身都夠晒靚女啦，無奈坐正FYY隔籬，頓時黯然失色。咁講吖，拋胸上陣嘅靚女有唔少，但就唔夠FYY「二度發育」、白滑激凸咁鬼搶鏡。鹹濕仔爭相研究，何解同一個女人，身材可以時大時細，猶如鬼影變幻球一般？

哈哈，點都好，呢一回FYY贏得漂亮，憑實力擊倒一眾靚女。再睇吓佢嘅玲瓏浮凸Fit爆身材，同早前出席高層樂小姐生日派對、被指發福走樣截然不同，證明真係有下過苦功，終於收身成功，抵佢成為風頭躉啦！

好可惜，即使喺大騷扳回一城，FYY似乎未能擺脫個大雪櫃，至今拍劇無期，出鏡都係做吓綜藝主持，行行企企，食飯幾味，真係嘥料。唔通佢都要好似視后Ali咁，坐到約滿夠鐘走人？嗚呀，之前都多次傳出，FYY對事業發展停滯不前心灰意冷，於是不停讀書進修、裝備自己，考獲多項專業資格，就算唔撈大台，一樣不愁出路！其實計本欄話齋，FYY手上又點止咁少牌吖，以佢咁優秀嘅條件，內外兼備，搵番個金龜婿上岸一樣得啫！

東網網站 : https://on.cc/東網Facebook專頁 : https://www.facebook.com/onccnews/