前「御用細佬」魯文傑離巢即失業　感激廖啟智伸援手助渡難關

兒童節目主持出身、現年53歲的魯文傑（Simon）近年轉戰劇場獲得好成績，近日為有份演出的ViuTV新劇《翻盤下半場》接受電台訪問，大談入行以來的高低起伏，他的演藝之路亦正如劇名，在人生下半場翻盤，由電視轉戰劇場後，終憑舞台劇《撒旦狂筆》首封劇場最佳男主角。

當年憑一則電視廣告獲封「王子」的魯文傑坦言從沒發明星夢，拒認年青時靚仔，考演藝只因喜歡演戲及teamwork，他說：「靚仔唔覺，只可以話四正，我好咧啡，返演藝都係波衫短褲。」他承認1996年演藝畢業前錯失了不少機會，包括中學時被陳慧嫻的前經理人趙潤勤當街邀入行做歌手，他透露：「中五搭地鐵佢望實又跟住我，叫我去casting試音我好驚，打電話嚟第二次先肯上去，見到張智霖同蔣志光海報先至知係堅，試完音唱得差都話簽我，最終覺得未讀完書唔簽。」至於1992年赴美拍攝成名作飲品廣告，魯文傑指當時也是演藝師兄迫他去試鏡才成事，而廣告出街後，他獲無綫、邵氏及亞視爭相羅致：「三間公司都有搵我，我見過方逸華，亦因為睇TVB睇大而簽咗。」1992年至1996年，演藝學院任魯文傑經理人，他一邊讀書，一邊於周末及周日錄製《閃電傳真機》。即使TVB第二年提出包薪經理人合約，他也沒想過放棄學業，「TVB叫我唔好讀演藝，點解唔畀我讀埋呢？做人無得後悔，雖然辛苦，亦好珍惜嗰四年讀書發生嘅嘢，對我好大幫助。」

魯文傑認自己沒野心，演藝畢業後滿足於拍攝《閃電傳真機》的收入或演「細佬」角色，他指：「一年260個騷，每個月出兩份糧，夠自己亦夠畀屋企。」惟全身投入TVB十六年，魯文傑慢慢由「御用細佬」變成「甘草」，問他後期只是做主持或司機的角色時有沒有難受，他坦承自己心態也有問題：「早期貪玩，有糧出，過得一日就一日，自己『放pea』嘅心態亦有問題。好記得後期有場同陸駿光嘅戲，本來大家都係行行企企，突然導演有堆對白想我講，我竟然唔想講叫陸駿光講埋佢。當時陸駿光話：『演藝師兄，你做乜搞成咁！』我係pea到咁！」最終2012年離巢跳槽王維基，他坦承心淡：「當時無騷爆，仲要我還騷，無糧出仲要我拍《東西宮略》，加上男人40，都要為將來打算，不如走啦。」

魯文傑離開TVB前因為演出香港劇團演戲家族的音樂劇《一屋寶貝》，邂逅比他年輕十六歲的太太梁嘉敏（Pinky）。二人交往不夠兩年就於2013年結婚，同年年底還誕下兒子魯煦耀（Jathan）。怎料初為人父同時，就需面對王維基不獲發牌面臨失業的打擊，魯文傑憶述說：「過程來回三次，最終嗰日成家食飯睇住電視，阿爸、阿媽、老婆、BB都響度，成家靜晒，回巢？轉行？好閉翳。嗰一年仍有糧出，但之後點呢？」魯文傑坦言感激已故的廖啟智，在他最困難日子介紹他到浸會教演戲。同時他亦有機會到主題公園當talent manager，加上太太產後亦有工作，兩公婆分擔才捱過最困難的日子，他感嘆：「疫情有段時間我無嘢做，都要靠我太太，所以我好愛我老婆，多謝我老婆，真㗎！」半生經歷不少挑戰，魯文傑相信「天無絕人之路」：「人生好得意，唔順中總會有啲順，所以唔使咁閉翳。」