馬米高挑剔Do姐英文｜一個人受唔受尊重唔關口音事　重點係你講嘅內容

（本文獲原創者授權轉載。文章題目由LINE TODAY編輯所擬，原題為 「挑剔Do姐的英文」。）

1. 新聞話，Do姐鄭裕玲獲電影公司邀請去美國訪問《沙丘瀚戰：第二章》的主要演員，好自然就用英語對答，點知俾馬米高取笑佢啲英文。

2. 如果話，全世界最鍾意笑人英文有口音、抽秤人哋英文問題嘅族群，係香港人，唔知大家贊唔贊同？(如果又話，當中以香港女性特別鍾意攞人哋英文嚟笑，唔知大家又贊唔贊同？)

3. 你有冇見過一個英文嘅Native Speaker，取笑人哋講英文嘅口音(係取笑，唔係教或指點)？

4. 用語言學角度講，英美好多人講英文都唔係字正腔圓，世界上也有很多不同accent的英文，道理就等於喺香港好多人講廣東話都唔係字正腔圓一樣。以前喺香港生活，係較難說服你，依家唔同，咁多香港人喺英國生活咗一排，你哋一定會信。喺英國，多麼千奇百怪的口音都會聽到，甚至你會質疑點解自己學咗咁多年英文，竟然都有聽唔明嘅時候。就算BBC記者，都有不同種族，帶少許口音很常見。

5. 咁喺英國生活咗一排嘅你，有冇遇過一個英國人，我指喺英國長大嘅人，講得一口流利會考listening英文嘅人，笑過你嘅口音？或聽到你有亞洲口音嘅英文而臉露不悅(俗稱西面)？有冇Native嘅英文Youtuber拍片教英文，專係以笑人哋口音、用字作賣點？(有嘅都不妨分享吓)

6. 成件事最有趣嘅係：取笑你英文口音同用字嘅，永遠唔係Native English Speakers，而係一群非以英文為母語嘅人。試諗吓，調返轉，幾個以英語為母語嘅老外，學咗十幾年中文，就互相取笑大家嘅中文，個場面都幾滑稽。

7. 教英文，係冇問題，例如讀錯咗Lounge這個字，指正Do姐，錯咗就錯咗，我相信Do姐也不介意，唔會應變反駁隊上身懸紅通緝你。

8. 但有好多嘢根本係搵嘢嚟講，特別出自即時對話。例如姓馬的話Do姐講「Do you have any special message to say to your fans in Hong Kong」唔夠好，要用message都應該係「Do you have any message for your Hong Kong fans」先夠精簡。如果那是一個Speech，因為應該寫好演講詞，呢個批評都叫有道理，但如果大家只係閒談，真係有人介意？你聽吓啲官員、主持、名嘴即場講嘢，再筆錄返出嚟，你一定可以寫得更精簡。好似姓馬的喺Youtube批評Do姐段片都明顯剪過，一句駁一句唔夠五秒中間都有剪接，點解？因為你事後聽返覺得有啲位唔好囉，係咪？如果開直播，唔通你真係句句都出口成文好似演講咁精簡？

9. 至於話Pad係衛生巾，唔講得，只可以講iPad或tablet——睇返Do姐段片，佢當時介紹緊酒店房設施，鏡頭影住部平板，Do姐就講：「大家見到有個Pad。」你就抽出嚟講話Pad係衛生巾。Do姐全段根本係講緊中文，並唔係喺訪問場合講，係一句好casual嘅中英夾雜港語，等於講中文時叫人「攞部pad過嚟」一定係簡單過「攞部tablet過嚟」。睇一個用字咩意思，亦要睇context，pad當然可以指衛生巾，但係咪唔可以指平板電腦呢？蘋果叫iPad，Samsung叫Tab，再查一查，小米及某些牌子的確叫自己的產品做Pad，唔通你話：「喂，Google打Pad出晒衛生巾圖片喎，佢哋賣衛生巾咁污糟？」同理，喺英國，tablet也指藥丸，有次睇GP個醫生話開啲tablet畀我，唔通我反問：「吓？要我食平板？我告你歧視。」

10. 上面用「影住部平板」，有冇人唔知講乜？如果你嚟留言話：「平板？係指一塊平嘅板，呢部嘢叫『平板電腦』，唔係叫『平板』。」你會唔會覺得自己好老套？

11. 教英文冇問題，學好英文亦係重要嘅。但近十幾廿年好多教英文嘅中心、網站、頻道、Youtubers等為咗搶生意搶views，經常將正常嘅嘢講到好唔正常同埋好錯，包括將潮語、俚語當成正統，然後話正常用語係老套、冇人咁講，就好似我教你廣東話，同你講冇人讚個女人「美麗」，一定要講「索」先啱，以後「千萬別這樣說」。還有一大堆教條：講英文唔應該有口音，你嘅口音唔符合牛津音，你講句嘢grammar有問題，你用字不符地道……如果你跟佢哋學英文，你未學成已經唔敢再講，因為你點講都唔會滿足到佢哋嘅要求(即係黃子華講嘅「瘦嘅標準係瘦再減十磅」)，都會俾佢哋笑，咁你唔敢講點樣學好英文？你不妨問吓喺英國嘅香港人，現實係咪好似佢哋咁講？Native嘅人日常對話係咪永無讀錯、永無grammar問題、永無口音個個字正腔圓？

12. 呢啲「港式英語教學」(其實還包括其他學科)，搞到好多人好驚講英文，於是永遠學唔好英文。中國人教育係批判式，乜都話你錯，啱都唔好讚，你由細到大都係一個Never-good-enough嘅小孩；英國教育係鼓勵式，冇人會笑你英文口音，冇人會罵你答錯問題，冇人會笑你問stupid question——但會鄙視你講嘅內容，例如你用牛津音同英國人講支持普京，一樣會受到鄙視。

13. 去咗英國嘅朋友，應該知道，Respect and Tolerance是British Values之一，你們嘅子女將來一定會講得一口流利嘅英文，但咁係唔夠嘅，做人千奇唔好咁狹隘。一個人受唔受尊重唔係你英文口音有幾好，而係你講嘅內容，呢個就係香港語文教育最大嘅敗北——你有冇遇過一啲名校女畢業生，喜歡點評下屬和你孩子的英文，但聽佢講對世情嘅看法，你會知道佢除咗英文講得好好外，不過係一個educated fool，亮麗嘅英文是愚蠢的包裝紙，而這種魔法，幾乎只喺香港有效，喺英國肯定冇效。

14. 姓馬嘅點評「Do姐英文夠唔夠應付荷李活嘅訪問」，現實係，荷李活仍然只會搵Do姐嚟做訪問，而一定唔會搵姓馬嘅，啲演員受訪完亦唔會拍段片話Do姐英文唔夠Native。

15. 新加坡英文出名口音重，笑佢Singlish，咁又點？依家外資去新加坡定去香港？

作者：一葉落英
▼Follow 一葉落英
Facebook：https://www.facebook.com/yipyatchee

【想在LINE TODAY刊登你的文章或影片，歡迎聯絡我們】