《念》陳蕾｜溫暖動人療癒心靈 為樂迷送上一點正能量
《念》陳蕾
陳蕾喺演唱會舉行前推出同名作品《念》，溫暖動人，療癒心靈，為樂迷送上一點正能量。
「很想找到快樂的感覺 是嗎 今天怎比昨日更差」
生活總有不如意之時，彷彿迷失方向，每日質疑自己。負面情緒經常出現，一直翻滾，浮浮沉沉，好似點做都走唔出，望唔到盡頭，快樂變得越嚟越遙遠，甚至有離開世界既念頭。
「撐不過就去哭別強裝歡笑 准許悲傷使你 內耗」
人有哀愁其實相當正常，當感到無力絕望時，就容讓自己傷感，無需要抗拒依種感覺。見攰就抖，想喊就喊，無人會責怪你，比自己多點時間同諒解，好好抒發情緒，沉澱心情。
更要緊記身邊定有願意陪伴自己既家人、朋友、伴侶，仲有依首作品，每多一個人分擔，煩惱就會少一分。世上總有人愛你明白你，你永遠唔會孤身一個。有需要就搵人盡訴心中情，只要處理好情緒，一切問題都會變得簡單。
保持信念，心中有光，即使睇唔清前路，面對既困難亦無法改變，但都可以一步步慢慢向前走，有時多一份勇氣同信心就能踏過所有難關。
「當你再聽到 腦袋中的擺佈准我陪著你 記得傾訴」
近年社會氣氛壓抑，大家面對既壓力實在太大，每個人感覺都隱藏住一份憂愁，彷彿失去希望又難以言喻，好似搵唔到一個出口。
其實未來是好是壞我地無法預料，控制到既就只有心態。快樂的確唔容易得到，但我地可以閒時做多啲喜歡既事，見多啲喜歡既人，嘗試享受每一刻，活在當下，或者世界無想像中咁差。
「將所有痛苦帶走不要念記 要記住我 願意去為你撐起」
如果你依刻生活愉快，當然值得高興，但都不妨對身邊人表達多一份愛，一句說話、一個擁抱既威力遠比想像中大，好多走到懸崖邊既人其實只係缺一份關心。
「也許我沒法感受你的傷痛 只想親口講句 我愛你」
歌詞以外，《念》以溫柔聲線同旋律，深深打進我心，非常感動。同陳蕾其他一樣作品，聽完會充滿力量，感覺內心被溫柔地安撫，相信唔少樂迷都曾經喺低谷中比佢既歌聲救起，重拾動力再去面對生活種種挑戰。
感謝陳蕾一直用音樂陪伴每一位，永不離開。演唱會在即，期待再次喺現場比蕾子震撼，紅館見！
「世界是很荒誕 未可改變至少可以共你一起 別散」
《念》陳蕾
曲：陳蕾
詞：陳蕾
編：趙浩權/蔡德才@人山人海
監：趙浩權/蔡德才@人山人海
「我最自責 沒有發現你痛悲
也沒法 用我正念去救起 瀕死的你
將所有痛苦帶走不要念記
要記住我 願意去為你撐起
記住你 被我愛著別去死
很多轉機別自行分離」
▼Follow hkpopculturelover
Instagram: https://www.instagram.com/hkpopculturelover/