馬拉松與人：Hei 靜岡馬拉松

渣打半馬意外地跑到唔錯嘅成績之後，對自己信心都大咗。半馬1:17嘅表現理論上係有衝擊2:40嘅能力，但自己都係傾向保守、唔想冒險，所以將目標設定喺2:45-2:50先，主要係想跑一次執行得好、無意外發生、順利嘅馬拉松，多過要發揮最大潛力去跑個好快嘅時間。

渣打同靜岡馬距離剛好一個月，即係練多兩星期就可以Tapering。渣打狀態確實幾好，但都係先調整，所以頭兩個星期冇心急，只將重點訓練放喺最後兩個長課。

最後一個月嘅訓練尚算順利。唯一暗湧係終極長課後，左腳踝畀賽鞋「梗」傷咗。行路、慢跑都冇事，但一著賽鞋就痛。睇咗兩次Physio控制狀況，但賽前撳落仲係痛，算係多咗樣不安定因素，不過自己都冇諗太多，盡咗人事，剩低就聽天命。

唔講咁多直接飛去比賽當日。

喺會場除衫熱身嗰下真係好凍，係凍到震曬嗰隻。我係勁怕凍，寧願熱少少都好過勁凍，好彩之後有太陽曬住暖返少少。熱身全程同馬拉松PB比我快嘅學生Alvin一齊，大家都分配喺S區，完全唔使迫同提早上線就排到去好前嘅位置。基於我對佢嘅了解，當我保守而佢進取時，大家多數都會喺同一集團跑，但落到場太多變數就唔事先夾了，點知開跑後條友跑咗1K就一直喺我前面，唔理佢，反正之後都會追得返，追唔到就佢本事啦，哈哈。

開跑後，幸運地腳冇痛，但頭幾km腳感都好怪，跑得好唔自在，唯有嘗試分散下注意力、週圍望下，但依然充斥唔協調嘅感覺。總之頭10K就係覺得自己未入局、覺得週身都唔舒服、冇好Fresh嘅跑感，甚至唔係好想跑，覺得漫漫長路都要帶住呢種感覺跑就戰意盡失。但諗起大迫傑本書講過：要去分割身體同心理、冷靜分析現況。所以就不斷同自己講：呢種不適感只係暫時性；而心理上有唔想跑嘅感覺，亦單純係主觀感覺，充足嘅訓練唔會令我咁早出狀況。

如是者大概過到12K見到打氣小隊，同大家拍咗下手，慢慢發現自己開始入局，跑得越來越順。頭10K大致上都係跑緊3:55/km上下，基本上我只係好有紀律咁維持3:50-4:00/km, 同時確保心率穩定維持Zone 2, 喺呢啲客觀指標輔助下，專注跑感、保持相應節奏，我冇好在意要跟住邊個集團，反正前後都一大堆人（日本比賽嘅好處就係好大堆我呢啲中等水平嘅跑手，如果渣打數到咁多人嘅位置應該落到4:15/km左右速度）

15K左右食第一包Gel，Plan好之後每隔一個站（大約5km）食一次，一個站飲寶礦力、一個站食Gel，好似將賽事分割做好多個大約2K多啲嘅milestone，成件事易過咗好多。10K到半馬呢段過得好快，陸續都過咗唔少人，半馬1:23:03，叫做預期之內，冇諗太多，只知道嚟緊10K要更加謹慎，因為咁多場全馬意外都係發生喺2x km呢啲位。

25km打後開始出現唔同嘅難點。先係一段仔上橋、再嚟就係長達十幾公里嘅大逆風路段，同自己講要保持敬畏之心，呢一刻順利，但意外隨時可以喺下一公里出現，最後慶幸完全冇意外、難點對自己亦冇乜難度。

上斜時完全唔急（唔知點解啲日本選手好興加速），同自己講做咁多GYM就係呢啲位用，去返平路時慢慢就上得返去。至於逆風，好多人都話係收皮位，我啲學生們都被重擊。本身我就好怕跑大直路，覺得一望無際嘅感覺好漫長，但呢段路因為多咗大風，我反而覺得好有趣、好考功夫。一感受到啲風喺邊個方向吹過嚟、我就縮去搵人擋。大風係有影響，但對我唔算大，最多係配速跌咗幾秒，我剩係提醒自己唔好跌出4分、同時唔好心急，就算跌都唔緊要，優先跑好節奏、控制輸出一致，唔刻意為咗對抗啲風而用多咗體力就OK。

講多少少，呢段我諗起季初場機場三跑10K, 當時體驗過360度無死角大風，自此都冇覺得有比賽大風過嗰次；嗰場唔算跑得好好，但一次唔算好嘅經歷可以喺今場幫返自己，不禁感嘆Trust the process有幾重要，所有嘅過程將我帶到嚟呢度，令我有力量前進。

不知不覺就跑曬逆風路段，沿途同富士山緣慳一面，去到呢個位大概35-36KM, 有啲意外自己一啲狀況都冇，精神、腸胃、腳都仲係好好，但嗰刻冇上場渣打出西隧後不斷加速嘅意欲，係咁同自己講keep住先啦、下公里先加，但跑下跑下又一公里，去到39公里反而收慢咗。我覺得係因為去到呢啲位，點跑都PB，點收腳都2:48內，冇人迫就冇乜心力追；加上其實身體都累積咗唔少疲勞，要推起佢就要靠意志，但個人冇乜，反而有種強烈嘅感覺想輕鬆、可控地返去。不過事後先知原來最後幾公里平均快咗5-10秒，可能冇咗風阻、順住節奏就加到速，意外地做到negative split，最後100米都因為意外地聽到陌生人廣東話嘅打氣聲音而加返速。

記得跑終極長課最後幾公里時，有種好感動嘅感覺，因為自己努力咗好耐、終於跑到訓練嘅終點，大功告成，之後可以休息了。但今次最後幾公里都冇乜感覺，直到衝線都冇乜感覺，但理性上同自己講：大PB喎要激動啲！咁就興奮咗一下，留到一張喺終點線振臂高呼嘅相。衝過終點線就好似發咗場夢咁，明明頭10K好漫長，但之後嘅路好似眨吓眼就跑完，或者進入到一定程度嘅mind flow，唔算好激動，但都有一下開心，因為我終於征服咗自己最弱嘅馬拉松，仲要覺得自己未用盡全力。

不過PB就係咁嘅一回事，已經6年冇PB，所以我忘記咗PB時就係會有呢種遊刃有餘嘅感覺，因為當中唔存在意外同驚喜，只係如實呈現努力訓練嘅成果，令我諗起一句說話：「你必須非常努力，才能看起來毫不費力。」加上我覺得馬拉松要跑得好，比起拼盡全力，更加講究穩定、紀律；能夠冇意外、冇突發情況地正常發揮已經贏咗，但做到已經好唔容易，而今次幸運地做到。

呢種大PB嘅淡然好奇妙，或者我並唔係幸運地實現夢想、而係踏實地實現目標；又或者對我嚟講，過程比起結果重要得多，結果不過係錦上添花。但至少直到兩個星期後書寫仍然有啲回味。

六年前第一次sub3但自覺成績唔滿意，講過下一場要直接跑入2:40內, 然後呢六年經歷咗好多，跑步呢件事喺我嘅生命變化咗好多、都改變咗我嘅生命好多。雖然今次冇跑入2:40、都已經失去咗當時嘅雄心壯志同心力，但依然感謝自己同感謝過程，仍然繼續跑步，用雙腳將自己帶到嚟呢度，時間背後嘅一切比時間本身來得更有意義。

仲有就係多謝我班學生，唔係大家報，我都唔會報；亦都係睇住大家練，我先有動力自己一個練。都好開心同場有兩位男學生Sub3，一位女學生Sub330，之後都會同大家分享下佢地嘅故事。

2025.3.9
靜岡馬拉松2025
氣溫6°C 濕度60%
2:45:36（Personal best）

Please follow Insports Hub on Facebook & Instagram
https://insportslab.com/
FB
https://www.facebook.com/insportslab
IG
https://www.instagram.com/insportslab/