鄭丹瑞嫁女 枱底互踢 爆笑提親過程 簽紙一刻淚崩 腦海閃現愛女成長片段

藝人鄭丹瑞（阿旦）日前到新城廣播接受李有毅（Ben）和兒子李國煒（Benson）主持的《Ben同Benson「Chur」到行》訪問，暢談跨越50年的演藝生涯與家庭生活；阿旦在節目中除了分享與兩名女兒的相處點滴，還特別分享大女兒鄭瑤（Zaneta）出嫁時的感人時刻，展現鮮為人知的「暖爸」形象。

阿旦在訪問中透露，從不以權威方式教育女兒，「我同太太有經常同阿女講，爸爸媽媽冇要你考第一，你唔好考包尾就得。」阿旦還透露堅持多年的家庭習慣：「自從生咗兩個女兒，我從來唔出去應酬，因為每晚都要返屋企同兩個女食飯；嗰一餐晚飯好重要，一家四口喺餐桌上講廢話。」這些看似無意義的日常對話，卻是維繫家庭情感的重要時光。

而阿旦太太亦制定了一條特別家規：「除咗換衫之外，其餘時間唔准閂門，食飯一定要喺飯廳食，唔可以喺房食。」他解釋這家規的初衷：「佢一閂門，你以後就開唔到佢個門，佢喺裡面做咩你都唔知。」這種開放式環境讓家庭成員保持透明溝通。

回憶大女兒Zaneta與金融才俊男友Jacob Chan註冊結婚當天，阿旦真情流露爆喊，他坦言完全控制不住情緒：「我以為憑我咁多年嘅演技，啲眼淚可以吞番，點知嗰張紙一放喺枱面，我開始要簽嘅時候就頂唔順，嗰種感受就係『咁就嫁女喇』，佢出世嗰日我仲仍然記住。」他形容當時腦海中不斷閃過所有畫面，深刻感受到時光飛逝。

面對前來提親的女婿，他憶述當時的搞笑情景：「都知佢係上嚟提親，但我同太太都唔識反應，禮金方面唔好講喇，總之你要對我個女好。跟住我哋兩公婆就喺枱底你踢我隻腳，我踢你隻腳，啲畫面好好笑。我哋唔係賣女，最重要係你鍚我個女，你答應我呢樣嘢，呢個係無值寶。我娶老婆同生兩個女，就係要縱佢哋。」我女婿話：「外父你縱壞你個女？我話係呀，我就係鍾意縱佢。」

鄭丹瑞總結做父親的心得：「冇人會識得做爸爸，都係邊做邊學。」同時感謝太太全程陪伴孩子成長，並強調：「我唔知道能夠陪伴佢哋幾耐，但佢哋嘅人生應該由自己揀。」

現年70歲的阿旦，現階段人生目標是「認識有趣的朋友，做有意義的事」；他將於11月推出新書《我失敗，希望你成功》，分享半世紀演藝生涯的經驗感悟，作為送給自己的生日禮物，「出書對我嚟講幾大件事，因為已經廿幾年冇出書。我1975年加入電台，當中有太多失敗個案，我想將呢啲失敗分享畀大家，睇完之後你會上咗一堂。」

圖片：新城廣播