元朗素食掃街: 3大必試傳統地道小食
作者: Linda Yau 邱蓮達
「掃街」係香港獨有嘅文化，源於係上世紀嘅熟食小販檔，有魚蛋燒賣、臭豆腐等等，由街頭到街尾，一直掃落去，今次帶大家去元朗一齊去掃街，睇吓有咩純素地道小食。
驊記糕點 神級糯米糍
多次去元朗，都與驊記糕點無緣，每次去一係摸門釘，一係勁多人排隊。閒日休息同朋友午飯後，竟然見到好少人排，今次機會黎啦，終於可以試到元朗名物糯米糍。
雖然話少人排，但因為老闆娘即叫即包，所以都要等15分鐘左右，為左食等下都要，一盒6粒，盛惠$36元。提提大家，因衛生同時間問題，所有錢錢都係自行找續。
驊記糯米糍偏向細粒，但勝在皮薄煙韌軟熟，爆哂餡，咬落滿是花生香脆，加上砂糖，食落都唔會太過甜膩，作為下午茶或飯後甜點就岩岩好，堪稱為元朗名物絕不為過。
除了馳名等糯米糍外，門外亦有客家茶粿、炒米餅、花生糖、砵仔糕、鹽焗雞蛋、鵪鶉蛋、咸肉糭等，有興趣既朋友可以試埋地道傳統糕點小食。
專賣肉乾的老店冠環球，佢地嘅齋雞粒真係冠絕全港，亦只此一間總店，住港島的我也要專程坐車去買。
港澳冠環球食脯專家 齋雞粒
齋雞粒有多種味道，麻辣、黑椒、沙嗲、南乳、芝麻同原味，每日新鮮製造，口感特別鬆軟，帶微甜辣，沒有油溢味，事實上係有點黏牙，亦因為黏黏的，先有煙韌的口感，無損我多年對他的熱愛，我敢說一天吃一包也絕不過份，係送禮同手信首選。
一素店 純素燒魷魚
係冠環球行入少少就係純素雜貨舖一素店，專賣多國純素產品，亦設有VEGGIE2GO的純素外賣，佢地既出品有幾好食真係唔洗講。
當中嘅福建特色小食純素潤餅係我大愛，以新鮮蔬菜為主、芽菜、荷蘭豆、豆腐等等，特別加入福建特產虎苔及清甜的花生麻粩，集咸、甜、鮮、爽、脆於一身，令人食過返尋味，潤餅不定期供應，有緣見到的話真係要試試。
另一個沙嗲串燒杏鮑菇，我叫佢做印尼燒魷魚，沙嗲醬係靈魂所在，全自家製不含五辛成份，味道濃郁鹹香帶有一點甜，加上花生粗粒，夠晒惹味。杏鮑菇厚厚的一片，炸的外面香脆，內裡煙煙韌韌，很有咬口，味道同質感真的神似，老闆娘，唔該多沙嗲醬啊。
仲有其他自家製嘅美食，「我不是奶茶」、「港式奶茶椰奶凍」、「宇治抹茶紅豆冰」、「火龍果西米露」、「事頭婆XO醬」都係好受大家嘅歡迎。
驊記糕點
地址：元朗元朗安寧路20-24號利群樓地舖
港澳冠環球食脯專家
地址：元朗青山公路 – 元朗段32-34號任安樓地下E號舖
一素店 One Vegan Shop
地址︰新界元朗又新街35號怡豐大廈地下12號舖
作者: Linda Yau 邱蓮達
Contact Me :
Facebook: Linda Yau – 邱蓮達
Instagram: kitlindayau
Website : https://kitlindacat.com/
請追蹤癒報:
Facebook: hkhealpy
Instagram: hkhealpy
YouTube: @HealpyPost