社交媒體如何影響藝人？令Phoebus孤獨咗，定無咁孤獨？

【追追趕趕 高高低低】
唔知大家同唔同意，玩音樂難，出完作品，做宣傳、玩唔同 social media 更加難。

IG 新功能層出不窮，由 Reels 到 2023年2月推出嘅 Broadcast Channel （類似功能喺 WhatsApp 、Telegram 都有出現）；7月初，Meta 新平台 Threads 推出，近月又重新多咗人用。不同社交媒體、功能湧現，作為 artist 嘅謀生工具之一，每個新功能都影響緊佢哋應該點調整方法，呈現同一個訊息畀觀眾。佢地第一身會有咩睇法？會唔會覺得難以適應？

我帶住呢個問題，問問 Phoebus ，既然新歌叫《孤獨先生》，就更加好奇，大量社交媒體，令 Phoebus 孤獨咗，定無咁孤獨？

◤ Broadcast 相對嚟得更簡單 ◢⁣⁣⁣⁣
「佢哋嘅出現，令我同歌迷距離近咗好多，但唔會令自己難適應，只係難兼顧。當我開咗 broadcast 講嘢，喺 Telegram （下稱 TG）講嘢嘅頻率就會少咗。所以有加入 TG，但冇加入 broadcast，或者調轉，就容易覺得 “佢成日都冇上水嘅”。我只可以喺有限嘅時間，儘可能同大家互動。」

7月推出嘅 Threads ，Phoebus 都好遲加入：「到而家我仍然冇 post 過嘢，真係用唔到。自己嘅習慣係 IG update post 同 story、broadcast，開 live。但我覺得 artist 必須要花時間學用新嘅 media，否則好易被淘汰。」
所以 Phoebus 透露，不時會睇下 Threads 入面嘅內容。「我會睇嗰啲 “成功人士的十句話”，“如何成為有錢人”（笑），容易攞啲資訊性嘅內容。但同歌迷交流，我偏好喺 IG 或者 broadcast。」

加入 Phoebus broadcast 嘅朋友不難留意到佢嘅活躍，由一一回覆 “一人一個想孤獨嘅時刻”，到 happy share 同偶像陳柏宇嘅合照。而 broadcast 一個特別嘅地方係，儘管入面有數千個成員，但冇人有權力回覆你，某程度上亦係一種孤獨嘅狀態。呢種溝通模式，對 Phoebus 吸唔吸引？

「我知道好早期韓國已經有 App 可以睇到 artist 分享出嚟嘅日常生活、行蹤，但無人可以回覆。資訊會無咁複雜，始終喺 TG ，一樣嘢有好多人覆，你會怕追唔切，broadcast 相對嚟得更簡單。」

◤ 萬人陪伴嘅孤獨感 ◢⁣⁣⁣⁣
表面上，藝人有大量 followers，喺社交媒體隨便出 post 都有幾千 likes，表演有好多歌迷支持，未必同一般理解嘅 “孤獨” 連上關係。但對藝人嚟講，亦會有一種，我哋未必能夠身同感受嘅孤獨。社交媒體嘅出現，看似有萬人陪伴嘅感覺，會唔會反而令你更加孤獨？

「任何角色、身份，都有屬於佢獨特嘅孤獨。我作為藝人，最容易感受到嘅，就係有口難言。好多時未必有人，真係可以完全明白你，嗰度會有一種孤獨感。」

「呢點好矛盾，有時你喺社交媒體講一啲嘢，得到人哋嘅認同、安慰，相對上，你就好似冇咁孤獨。但喺真實世界入邊，冇改變過任何嘢。呢樣就係我要學習嘅地方。你好重視 IG ，因為係屬於自己，亦係一個謀生工具，但同時，你亦都要學識點樣離開 IG。佢俾到你嘅嘢，唔係真實。」

Phoebus 以 Justin Bieber 首 “lonely” （關於佢當年少年成名嘅孤獨處境）為例：「佢係有好多人鍾意，但都會有崩潰、孤寂嘅時候。所以社交媒體多咗人討論我，係咪真係令我冇咁孤獨？我覺得唔係。」

今年 Phoebus 遇到唔少風雨。「之前拍劇話我整花咗架電單車，但現場拍劇好多同事出入，我連借電單車俾我都唔知係邊個。有同事畀架車你，你就揸。事後車主就話，有人整花咗架車，仲好冇禮貌等等。呢個同我遇到嘅事實唔一樣，就會好想出嚟澄清。但講出嚟係咪真係有幫助？佢會繼續發酵。選擇唔講，但見到有人信以為真，你心裏面或多或少都有一種， “有冇人明” ？但你又改變唔到人哋點諗，又唔會想好似細路仔，你一句我一句咁嘈。呢度有一份額外嘅孤獨。」
Phoebus 直言要學識點樣坦然面對：「我繼續做好我嘅事，之後睇係小事一宗，但當下心情，就要學識慢慢沉澱、適應。」

◤ 歌迷霸氣宣言 ◢⁣⁣⁣⁣
調轉睇，社交媒體本意係連接完全唔認識嘅彼此，Phoebus 分享，亦會有令自己冇咁孤獨嘅時候。「譬如拍綜藝，一個人好多時，就係等 roll 機，同大家玩 Q&A 就冇咁悶。」

同粉絲嘅互動，一直喺 Phoebus 心中佔有重要嘅席位。「我嘅粉絲好霸氣，佢地話，”你追夢，我追你”，佢哋好多時係寫幾張紙仔畀我。譬如之前連鎖藥妝店品牌嘅工作，我收到一封信，佢親戚喺間藥妝做，PR 用咗好多方法想搵我做，最後成事就好開心，將成個經過寫俾我睇。窩心得嚟，又好好笑。」

孤獨，呢一刻對 Phoebus 係享受定難受？「以前自己覺得孤獨係可怕。世衛話孤獨等於食十五支煙，因為孤獨同肚餓一樣。人本身係羣體動物，舊時人唔可以獨自狩獵成功。所以一個人耐咗，自不然有個警號俾你，會有種唔開心，有種抑鬱感衍生。所以我細個未瞭解嘅時候，好容易會負面地諗呢件事。」

「而家係我想擁有一份寧靜嘅空間，我選擇孤獨，先唔可怕。我行運嘅地方係，唔完全孤獨地走每一條路，我有屋企人、朋友、兄弟，buses 嘅支持，畀好多力量我繼續行。」

想睇更多同類型文章：https://www.instagram.com/besidesmusichk/
支持 Besides：https://www.buymeacoffee.com/besidesmusic
樂迷投稿：https://docs.google.com/forms/d/e/1FAIpQLSeXQhj2bTugDRTnF2-HkOwemGjHSm9OYGqwn5NBeAWhT1VU-w/viewform