龍婷開騷堅拒性感　希望可以進軍紅館

「中年好聲音」歌手龍婷將於5月23日假澳門舉行巡迴音樂會，今日（23日）會晤傳媒透露開騷心情及準備，她表示由去年開始先後到香港、澳洲、青遠、廣州及東莞等地方巡唱，而澳門就是首次踏足，所以特別安排了全新表演，她說：「我會跳80年代Disco嘅舞蹈，以前唱王菲，鄧麗君嘅歌都係靜啲，但今次會跳吓舞。（跳舞係咪弱項？）唔係，我跳舞好叻，有兩年跳舞經驗，識跳古典舞之類，仲係自學而成嘅，不過之後主力唱歌先放低咗，但可以練番，Disco啲舞都係自由發揮，唔係有指定動作。」

問到跳舞環節可有準備性感舞衣配合？她堅定說：「唔會，我唔會性感，因為會好唔自然。（性感底線係點？）就算低胸都要大方、端莊、有女人感嗰種。」又謂已請了「聲秀」歌手甄敏芳（Jinny）擔任嘉賓，除因對方是澳門人外，亦是跟自己一樣翻唱王菲歌曲的歌手，所以望屆時Jinny可盡地主之誼帶她食地道美食。又談及同屆的「中年好聲音」歌手羅啟豪和譚輝智孖住首登紅館，她說：「梗係知啦，見到有好多佢哋嘅燈箱廣告。（恨上紅館嗎？）梗係想，紅館係每位歌手嘅目標，不過我暫時未得住，依家唱緊巡迴，希望可以唱到去紅館啦，我梗係恨喺紅館開騷，我𦧲飯應。（但佢哋個演唱會被批評票價偏高屬天王價？）咁呢啲係主辦決定嘅，我冇乜意見。」對於指其唱片公司偏重周吉佩，譚輝智及羅啟豪等歌手？她說：「重男輕女？唔係呀，其實唱片公司都畀咗好多資源我，由唱歌比賽第一屆開始至今4年，我哋攞咗好多演出經驗。」

東網網站 : https://on.cc/東網Facebook專頁 : https://www.facebook.com/onccnews/