【觀後感】《洪嘉豪 Kaho Live 2024》出道第六年終踏上紅館舞台
洪嘉豪出道第六年，終於踏上夢寐以求既紅館舞台，以精彩表現唱出難忘一夜，無令樂迷們失望。
(我睇13/4頭場)
「鳴謝 任何劇情絕不拋低我 讓無限橋段光陰一起消磨 圍繞我」
院長開場先感人地唱出《主角光環》，完結時布幕一下，就好似象徵今晚主角正式登場。緊接型格演繹《Truth or Dare》同幾首歡樂輕快作品，成功抄熱全場。
「面具下 蔑視眾生對罵 在操控萬民 盡興吧」
氣氛一轉，舞台以黑紅色調令觀眾彷似置身大型儀式，不寒而慄。《預言家》氣勢強勁地震攝人心，加上舞步，帶大家墮入暗黑世界；《逆便所》承接陰沉氣氛，自彈自唱控訴內心憤怒；
《活誰的命》舞台效果配上背景畫面，將《正義迴廊》既戲劇張力喺台上呈現，非常震撼；最後《那年盛夏》兄妹團聚，以歌聲將主角從黑暗中拯救，走出光明。成part相當驚喜，情緒不斷遞進，展現嘉豪不一樣面向，係我全晚最喜歡既環節。
「你敏感我懂 不安脆弱我亦懂 傷疤間斷還陣痛 交給我 當崩潰的抱擁」
黑暗過後，嘉豪以三首甜蜜作品緩和大家心情，帶嚟一點窩心溫暖。坐完一段情緒過山車後，再串連演繹出一眾情歌。先有溫柔虐心之作《我懂》同《救》，雖然院長親自創作既歌未必最受樂迷喜歡，但個人認為同樣高質。
及後再到幾首成名作。《掉進海的眼淚》由2018年聽到依家，每次感受都非常深；《窮小子》為大家唱出心聲，每個人心中其實都有個想努力證明自己既小孩，聽到眼濕濕；推出999日後既《逆時車站》多咗份成熟味，但依舊動人。
「想跟妳沿途美景都一起飽覽」
最後演唱會穿插幾首談論處世態度既作品完結。生活如果能夠本著隨波遂流既心態，不要太介意別人目光，縱使一定會面對挫折，但只要盡咗最大努力，就一點也不丟臉，好有意思。
「寧願 一生多點歷練 憑披荊斬棘的實驗」
演唱會總結咗嘉豪由出道以來既經歷，勾起樂迷滿滿回憶。喺多咗一堆不同風格又高難度既作品下，院長唱功一樣咁穩定，亦比以往更有力量，睇得出佢想做到最好嚟答謝一班樂迷。
成場show各方面都非常出色，嘉豪仲不斷同觀眾近距離互動，相信滿足到眾多粉絲要求，我就睇得開心盡興，院長真係成長咗好多，已經由小角色蛻變成一位當紅歌手。比較可惜係再次同《十號儲物櫃》依首對我意義重大既作品擦身而過，希望下次有機會聽到！
「問題不清楚 大可將錯就錯 若世間太過煩瑣 仍舊多簡單是我」
雖然以往表達過唔少次我對院長既喜愛，今次都想不厭其煩講多啲。
我由《掉進海的眼淚》時期開始留意洪嘉豪，之後慢慢成為忠實fans。快樂時聽輕快既作品會加倍開心，不快樂時聽院長既悲情歌總會得到一點安慰，抒發所有傷感，陪伴我渡過低潮，百聽不厭，喺我心中既地位舉足輕重。
就算我留意眾多香港歌手，但近年你問我最喜歡邊位，我都會毫不猶豫地答洪嘉豪。
「不快樂怪誰 失散後隨便活過去 過去像雨水」
從不消失戀愛連續school tour嶄露頭角、大館面臨低潮、麥花臣感動而泣，九展展現多元一面、西九獨力擔起整個舞台，每次live既畫面我依然歷歷在目，彷如昨天。轉眼間喺紅館睇到佢完成一個咁精彩既表演，受盡歡呼，個份感動非筆墨能形容。
好榮幸能夠見證依個窮小子爭氣地一步步發光發亮，成為大器，更成為大家既主角，替嘉豪依個平凡名字寫上不平凡故事，實在得來不易。
「想說服自己 早晚成大器 想到不放棄全因你 縱使筋竭力疲」
紅館只會係其中一個里程碑，未來仲有漫漫長路同挑戰等待院長。不過無論如何，院友們都會一直默默在旁，永遠唔會拋低你，期待嘉豪今後既作品繼續為大家帶嚟溫暖。
洪嘉豪，感謝你🧡
「感激光環給我 炫耀我這種配角」
▼Follow hkpopculturelover
Instagram: https://www.instagram.com/hkpopculturelover/
留言 1