《臨時決鬥》一套唔算太賀歲嘅賀歲片 劇本完整流暢又有意思
《臨時決鬥》作為一套唔算太賀歲嘅賀歲片，劇本完整流暢又有意思，未睇嘅朋友可以放心入場。
（以下有劇透）
「左一拳右一拳 我哋大家出一拳 左一拳右一拳 打拳真係好辛苦呀！」
電影由一場臨時以起嘅拳擊比賽開始，再發展唔同角色嘅故事同改變。節奏快，由頭到尾毫無冷場，兼備搞笑熱血，角色性格刻劃分明，對白精警，帶出堅持嘅可貴同價值，tag返《城寨》同《臨時劫案》嘅橋段亦相當有趣。
故事重點嘅拳賽拍得認真寫實，女仔上擂台一樣可以拳拳到肉，令觀眾睇得緊湊。配上外冷內熱嘅師徒線、溫暖又充滿愛嘅家庭線，構成一個完滿故事。
「瑟縮卷進這角落裏 肌膚刻上確切年歲 清楚不過這叫憔悴」
而要數到戲中亮點一定係三位女主角。Gigi做依種半喜劇角色一向拿手，認真幽默同樣掂，中間仲對電影業帶出一點反思，發人深省； 娜姐每次出場都好吸睛，外剛內柔，又靚又型，唯一可惜係戲份唔夠多；王丹妮終於擺脫梅艷芳嘅影子，做到個種拼盡全力嘅決心，一步步被拳擊轉變同成長。
「Pick me up 聽懂心裡那字句 流盡汗水 來擊倒恐懼」
然而，同《臨時劫案》相比，一套胡鬧中帶點認真嘅黑色幽默，一套平穩地講咗一個故事，題材亦唔算太特別，甚至只係勉強稱得上「臨時」，難免會比下去，但我仍然係喜歡《臨時決鬥》嘅。
「Pick me up 抱膝腫痛也樂趣 直至躺著累 別再躺著淚」
最後，今年賀歲檔嘅成績同去年相比可以話係頗為失色，或者都說明傳統賀歲片已經逐漸失去叫座力。未來港產片想借依個檔期發圍，可能要諗諗新意思。不過又無需一下子氣餒，2024港產片嘅成功引證觀眾係願意入場，只係佢地嘅口味已經有所不同。
同埋個人認為《臨時決鬥》同《祥賭必贏》都係不俗嘅作品，新年假後大家可以繼續入場欣賞，保證唔會令你失望！
「好啦，大家不如飲啖水，冷靜下啦！」
▼Follow hkpopculturelover
Instagram: https://www.instagram.com/hkpopculturelover/