馬拉松與人：Zero 黃金海岸馬拉松

上年練柏林馬開始受傷，個身體成日反反覆覆，腳嘅唔同位置成日都會有時痛、時唔痛嘅情況（到而家都仲會）。喺年頭開始跑得返啲似樣嘅嘢，又諗住年尾學校比賽完晒，無咁忙，決定飛去（海外）教練度「返學」學吓新嘢。教練問我想咩成績？我只係話想完成，最多都係想sub跑返2:30附近，朋友問我想做咩成績，我都係答落到場先算，又或者我最後唔跑。

落地頭2個禮拜練咗唔係好多嘢，跑咗一場10k都有32‘頭嘅水平，我已經覺得好似有啲返返嚟。之後嗰2個月每一次嘅練習都唔敢推到自己好盡（其實強度又唔係真係咁大，係我怕死）、每一次嘅慢跑都係瞓到自然醒（係香港真係瞓唔到）、拖到盡頭先走去跑（無數次想逃避練習）、每一次跑完長課都係會跛咗行唔到幾日（左腳腳板底同腳趾每一步落地都痛）。

直到GCM前2個禮拜真係痛到頂唔順（我都有諗過係唔係骨裂），走咗去睇物理治療@understand.rehab ，多謝晒佢幫我救返對緊到癲咗嘅腳，多謝佢話我知唔係骨裂可以繼續跑，但針完之後做咗2日「百變星君」– 對腳係伸唔直😂！

跑前一個禮拜就上GC到感受吓溫度、濕度同風度，點知個天氣勁似上年喺英國咁，成日落雨停雨再落雨，啲風吹到我成個人可以倒返後行（有睇過ig story應該都感受到），都已經盤算緊最後返唔返到終點。

喺開賽個日先知今年改咗路，心諗都係咁跑㗎啦。一開始跟咗前面跑，但頭2k跑緊3:20/k（明明呢個集團本身講2:25-2:30完賽）跟住跑返自己想要嘅節奏– 3:30，頭5k好快就形成一個群（但其實開始咗唔夠10分鐘已經出汗出到好似跑完90分鐘咁，仲要腳痺），同一時間已經日出咗，氣溫即刻feel到喺暖。

一直跑到過咗20k腳痛嗰位終於痛出嚟（之後個22k都係盡力keep住唔好痛多咗咁跑），頭30k我都目標keep住3:30/k附近，過咗32k計吓數，keep住返到終點都有機會Sub2:30, 但之後嗰10k面對嘅逆風直頭懷疑人生，個pacing直插落谷底。最後2:33返到去。對於我嚟講只係不過不失，可以話係好、又可以話唔好。Anyway都終於解脫咗啦！

呢兩個月多謝各位老細同學生俾我放咗個假，多謝屋企人俾我呢兩個0收入，多謝 @jayfcwong @mikemikemei 你哋成日俾我打搞，仲要幫手車出車入同黐吓飯食。Thanks @run_crew @garyhoward800 always having me and have a good training。多謝 @nat_aliewong_ 成日幫我練英文。多謝各贊助商俾唔同嘅衫褲鞋襪、補充品我喺呢段時間用。

Please follow Insports Hub on Facebook & Instagram
https://insports-hub.com/
FB
https://www.facebook.com/insportshub
IG
https://www.instagram.com/insportshub/