《金童》3日票房過200萬　谷德昭墮騙局買唔到飛

由張繼聰主演的拳擊電影《金童》，花兩年時間操練身體，但最終等足6年，仲要自資6位數字完成後期才順利上畫，可謂每一幕都有血有汗。雖然辛苦，但電影上畫3日便迎來好消息，截止昨日（23/11）下午6點，票房已達200萬，成績相當理想。圈中人亦爭相入場支持，包括導演谷德昭，不過他最後換來一吐氣，事關去到現場先知冇飛賣。

昨日晚上，谷德昭在個人社交平台發文，表示自己原本想看某戲院5點半場次的《金童》，他在5點21分以「HKMovieApp」查看售票情況，發覺全綠（一張都未有賣出），正當他肉痛點解套戲冇觀眾，並決定去到現場才買飛，結果碰釘！「原來一早已被包場，網站完全冇 Update，售票處站滿了同樣遭遇的觀眾，有人跟售票員理論，售票員解釋戲院本身的網站一早已Update。」

谷德昭總結事件是「香港電影網站」未有做好自己本份，更嬲到直斥︰「咁嘅網站確係廢！」雖然他都有怪自己，沒有用官方戲院App查看一次，「但係咁要你把鬼，我白行一趟事小，累到套戲令一心捧場的觀眾失望，真係好唔啱。」幾經轉折，谷導終於都看到電影，事後亦寫下感受︰「難得有套咁好心地，又咁正氣嘅港產片，輕鬆得嚟仲令人感動添。」