劉穎鏇做隊長領軍襲羊城　張振朗國語麻麻亂噏「劉穎船」鬧笑話

藝人劉穎鏇（Tiffany）、張振朗、陳山聰、何廣沛、羅天宇、張馳豪、孔德賢等昨日（21日）現身廣州出席「星聚羊城．籃動灣區」，並宣布成立明星籃球精英隊，由Tiffany擔任隊長，她表示：「好開心，之前樂小姐同我哋講過將會有機會成立籃球隊，我知道公司好多同事同我一樣都好熱愛籃球，之前大家有機會都會打吓，今次終於可以一齊合作去成立一個隊伍，仲要同咁多咁犀利嘅籃球手去切磋，我係好期待，我哋啲對手絕對唔簡單，所以我哋一定要勤力啲練習，希望可以好好發揮。」

至於國語不算太好的張振朗被要求在台上以國語受訪，講到與籃球的淵源，他笑言：「對我來說，籃球跟我拍戲其實是完全沒有幫助，為甚麼我在明星隊裏面，因為樂小姐邀請我，而且籃球對我來說是一個回憶，讀書時已經很喜歡打籃球，基本上每天都會去打籃球。」他指今次這個機會讓他找回小時候的感覺，希望隊長劉穎鏇帶領大家打好比賽，但就讀錯了對方的名字變成「劉穎船」，要主持人幫忙糾正。

陳山聰透露兒子Jaco已學了打籃球一年多並獲得獎項，故此知道公司組籃球隊即時參加，希望成為兒子榜樣及有機會跟兒子一齊比賽，提到兒子的契媽佘詩曼的新劇《正義女神》開播，他揚言：「佢（Jaco）緊係會支持靚女契媽，之前阿佘應承咗契仔，喺電話講忙完返嚟就請你食pizza，因為Jaco好鍾意食pizza，所以阿佘一返嚟就即刻約咗佢食pizza。」

另外，曾與阿佘在《新聞女王》第一及第二輯合作的何廣沛揚言一定會支持對方的新劇，作為網上衝浪達人的他每當有網友在社交網＠他，他都會回覆，問他每天花多少時間上網時？他說：「唔係花好多時間，一日玩一兩次電話，咁啱見到大家＠我，我就回覆吓。」對於網民稱他為「床寶」，他笑言：「慣都聽咗呢個花名幾年，多謝大家咁有創意。」談到加入籃球隊，他叫大家放心去進攻：「我知道大家打籃球都係諗住去入波，但我嘅專長係幫手攞籃板，得籃板得天下，大家放心射，我會搶籃板之後交個球畀你哋。」

東網網站 : https://on.cc/東網Facebook專頁 : https://www.facebook.com/onccnews/