《女神配對計劃》姜大衛兒子　靠扮老豆冧掂關嘉敏

無綫最新戀愛真人騷《 女神配對計劃》播出以來高居全城熱話，除了曾展望與葉蒨文的同居傳聞引發網民熱議，其餘幾位女神亦各有著落，明晚（22 日）播出的第三集，將會播出關嘉敏組（Carman）的「三角枱約會」！關嘉敏組的三名參賽者姜卓文（細 John）、iBanker 黃家俊（Matthew）及蘭桂坊攝影達人劉榮業（Andy） 各出奇招力追女神，當中姜大偉兒子細John更搞笑扮老豆，令關嘉敏一秒爆笑。

最新一集輪到關嘉敏坐到三角枱中，與三位心儀參賽者約會，以吊帶背心登場的她散發女神氣息，卻未知是否太緊張，進食前菜牛肉他他時竟然將食物跌在枱布上，而三位男士為免女神尷尬紛紛出招安撫，當中細 John 除說了一句：「睇唔到睇唔到，幫你遮住」為 Carman 擊退尷尬，還 Man 爆地幫 Carman 清理「被沾污」的枱面，暖男指數 100 分！

除了細心夠轉數，細 John 打開話題的能力亦相當高，當獲得與 Carman 面對面對話機會後，細 John 即乘勢重提二人當日首次見面時細節，並直球表示當時對Carman 其實有好感，只是礙於一個原因令他不敢邁向 Carman 多一步。另一搞笑位是，雖然細 John 與 Carman 面對面了解機會不多，但二人竟光速地聊到「你做我女朋友會唔會緊張」及「見家長」等問題，細 John更主動提議要扮演爸爸John 哥（姜大衞），大演見家長情境劇，結果成功令 Carman 一秒爆笑，細John提到爸爸姜大衞亦侃侃而談，健談坦白的細 John更自揭全家都是瘦底：「我阿爸同我一樣大嘅時候，佢係 120 磅，佢嗰時成日跳彈床，武打嗰啲，所以佢一日嘅運動量係超高。」

由於「三角枱約會」都是專誠為五位女神度身訂造，Carman 三個回合的過關條件與葉蒨文略有不同，本集曝光了其中一個 Carman 專屬的「搞笑」考驗，三位參賽者需要各自說一個爛 Gag 氹 Carman 開心，氹得 Carman 最開心者便可勝出。由於細 John 賽前已被睇高幾線，Matthew 及 Andy 自然各施各法迎戰這名「最強對手」！Matthew 採取全程𥄫到實策略之餘，又與曾展望一樣盡量爭取機會搭嗲及發言；至於 Andy，除了一嚟就送了一本印有「寧可一個人，也不將就」標題的書籍取悅 Carman，還全程「以退為進」令 Carman 意外跌入「唔揀 Andy 唔得」的困局！