明星成長 ｜《真相猜．情．尋》方東昇 中大新聞系GPA爆4 入行25年形容自己係「○○記者」

近日TVB節目《真相猜．情．尋》翻查香港世紀案件，成為城中熱話，作為新聞記者出身嘅節目主持方東昇一向有「才子」之稱，文筆得，口才亦得，且學識淵博，懂得7種語言，成為主持後更展現其幽默一面，因此被網民堪稱為「完美男人」。

自創啜核「金句」大受讚賞

方東昇現年45歲，加入TVB已有24年，由新聞部實習記者做起，擔任過港聞記者、及《晚間新聞》及《六點半新聞報道》主播，後來更有份參與電視節目拍攝，擔任如《世界零距離》、《長命百二歲》及《尋人記》主持一職，節目播出後反應熱烈，令方東昇變得更加入屋。作為主持嘅佢，拋開一貫新聞報導嘅平實陳述，自創啜核「金句」及幽默一面，受到觀眾大力讚賞。

有如此出色嘅成就，主要源於方東昇好學勤奮嘅性格，及對新聞嘅熱誠及抱負。方東昇中學畢業於名校拔萃男書院，為校內辯論隊隊長，常參與辯論比賽，鍾意講嘢，關心時事， 好奇心重。方東昇曾於訪問中提及，自己一早想入新聞系，由踏入中大新聞系嗰刻起，已非常清楚自己嘅去路。抱着對新聞嘅熱愛，方東昇於大學取得GPA爆4一級榮譽畢業，更獲得新亞書院獎學金最高榮譽誠明獎，有「中大才子」之稱。

「中大才子」精通7種語言

鍾情新聞嘅方東昇，曾稱新聞佔據咗自己生活一大部分，擔任學院實習刊物《大學線》實習記者期間，為咗趕稿排版，經常都無法參與家庭聚會。當時擁有一股新聞衝勁嘅方東昇，憑着膽色，更親自前往黎智英寫字樓附近，成功邀請黎智英作《大學線》專訪而成為風雲人物，令當時嘅老師及同學嘖嘖稱奇。

同時為咗做一個稱職嘅新聞記者，方東昇精通7種語言，包括粵語、英語、普通話、日文、俄文、德文及荷蘭語，更於一次前往荷蘭訪問荷蘭首相馬克．呂特時，以一口流利荷蘭文與對方交談，被觀眾讚識尊重人，更展現到個人修養及對世界嘅認識，方東昇對此表示：「去到人哋地方就講當地語言」。充分體現到方東昇對新聞嘅認真及尊重。

自言「病態記者」熱愛工作

對於記者呢個行業，方東昇曾表示呢一行經常周旋於不同嘅評價之中，所以成功感及挫折感都一樣大，更說 : 「要求低少少都唔掂。」從準備到採訪，從寫稿到新聞出街，即使再有信心，每一個環節都要謹慎小心，且認真嚴肅地對待，要達到求快、求真也求證。方東昇於前線打滾多年，認為最重要嘅係「有嘢落袋」令自己有做落去嘅動力，而放進袋嘅唔係錢，而係經歷。

記者常被定性為吃力不討好，錢賺唔多又辛苦，而方東昇形容記者呢一行「沒有發達的機會， 只有發揮的機會。」更形容自己係「病態記者」，工作與生活分唔開，連放假都會工作，不過同時又曾經引用新亞書院所說「手空空，無一物」講到，雖然而家真係手空空無一物，但依然覺得好充實同滿足，唔會覺得後悔。

圖片：網上圖片、TVB影片截圖