【Samsung A34評測】抵玩Samsung A系列 丨2023學生手機首選 丨高性價比三星手機 丨漸變材質外型 丨Samsung Galaxy A34 #Samsung #A34

又黎到Z世代達人嘅時間啦~ 主打親民價錢嘅Samsung A系列，近日就推出左Samsung A34呢款高性價比手機，今日我就即刻為大家開箱呢部手機~
首先睇睇個外形，今次喺我手上就係霧冰青色嘅Samsung A34，成部手機嘅設計都係採用傳統Samsung手機外形、主打簡約風格
而今次Samsung A34外形最特別嘅地方係，手機嘅背部採用左帶有漸變效果嘅材質，令到Samsung A34比人感覺好活潑、好新潮，都幾適合年輕人架~
Samsung A34嘅屏幕設有6.6吋Super AMOLED 螢幕，支援120HZ屏幕更新率，成部機身仲支援IP67防塵防水級別添。
Samsung A34設有5000mAH大電池，支援25W快速充電，足夠應付日常使用有餘
而性能方面，今次Samsung A34就會採用聯發科技嘅天璣1080處理器，等我又用跑分軟件睇下Samsung A34有幾多分先?
跑出黎嘅分數都唔差啵~ 等我試試實際效果又係點先
今次會測試呢兩隻遊戲，兩隻遊戲畫面運算都比較複雜，究竟Samsung A34表現又係點呢?
喺第一隻遊戲入邊，以降低遊戲畫質設定為前題，喺地圖行走嘅FPS都幾隱定，但當到左畫面比較複雜嘅劇情動畫或者戰鬥畫面，就會有輕微疾機嘅情況出現
而到左第二隻遊戲，Samsung A34表現就唔錯啦~ FPS相對比較隱定，無論係戰鬥畫面，定係地圖行走都好，FPS嘅波幅都唔會太大
到左睇片方面，無論係睇Youtube，定係睇帶有走馬燈嘅新聞片，一樣都係咁順暢，過關啦~
喺相機鏡頭方面，Samsung A34設有4800萬像素主鏡頭、800萬像素超廣角鏡頭、500萬像素嘅微距鏡頭，最後就會有一組1300萬像素嘅自拍鏡 頭。
主鏡頭影出黎嘅相表現都幾好，無論係細節保留度，顏色處理都有唔錯嘅表現，放大左張相之後嘅物件邊緣虛化，同埋雜訊處理，對一部以性價比為主嘅手機，我覺得收貨有餘啦~
超廣角鏡頭影出黎嘅相都好自然，唔會有魚眼嘅情況出現，同時成張嘅細節保留度亦都唔錯
而微距鏡頭對焦速度都好快，影出黎相嘅亦都唔差，相片顏色嘅味精程度唔會太重，同時物件嘅細節都可以充分咁表現出黎
Samsung A34 設有四種顏色，分別係霧冰青、霧冰銀、霧冰紫同埋霧冰黑。
而價錢方面，8GB RAM + 128GB ROM 現在有限時優惠只係需要HKD $2698，有興趣嘅朋友可以到Samsung官方網站了解詳情~
希望您鍾意我今次嘅介紹啊，記得Subscript meeeepmore嘅Facebook專頁，同Youtube頻道。同埋Alfred Mak嘅Facebook專頁，今集講住咁多先，ByeBye~