旺角潮州打冷　爆膏生醃蟹滷水盤｜十二樓潮州打冷大排檔

每次食潮州嘢最大嘅誘惑，唔係樓面啲姐姐，而係啲生醃海鮮，一黎價錢唔平，二黎大家可能都唔敢食，我都係見呢到幾乾淨企理先敢嗌。不過唔食生嘢都唔緊要嘅，其實主要係想講有個Set真係抵。

呢間新開潮州打冷真誇張，三個人叫個Set，除開100幾蚊都食到六道菜，仲要唔洗加一。而呢六道菜都唔係求其炒條菜，原條凍馬友、紅燒翅、滷水鵝、蠔餅蠔仔粥都有，足料到痴線，我反而想佢地炒返條菜比我。

-
🔸潮州翅超值餐 (2-3人份量 $398)
平時潮州大排檔一定要一大棚人食，呢到2-3個人食下飯都得，但六道菜份量真係幾多，如果多幾個人，叫一Set再散嗌其他都非常夠食。

🥢酥炸蠔餅
🥢潮州蠔仔粥
呢到嘅蠔仔真係值得一讚，聽店員介紹，佢地係特登去搵啲大粒嘅新鮮蠔仔，脹卜卜僅僅熟，非常鮮嫩，特別係蠔仔粥，入邊仲加咗啲魷魚，更加鮮甜。

🥢潮州紅燒翅
🥢原條凍馬友
呢Set竟然包埋原條凍馬友，本身散嗌都$148/$260，馬友魚油脂香特別濃；而且仲有紅燒翅，平時分分鐘幾百蚊位，不過當然唔係超貴價魚翅，但飲落非常鮮濃舒服。

🥢滷水拼盤 (鵝件、豆腐、豬腸、五花腩、紅腸)
🥢韭菜豬紅
而且呢到啲嘢真係大份，滷水盤有齊咁多款，一大碟上夠幾個人食，滷水又夠濃香；而啲豬紅仲誇張，份量完完全全係壓制韭菜，仲非常入味。

🦀生醃潮汕爆膏蟹 ($228 / $438)
真係非常爆膏嘅生醃蟹，其實醬汁味道都幾濃，連埋蒜頭辣椒上，啲蟹肉都入哂味，大家鍾意食嘅話，肯定清多幾碗白飯，另外仲有生醃海蝦、瀨尿蝦、螄蚶咁。

-
十二樓潮州打冷大排檔
🗺️旺角上海街451號地舖
📞5209 7989

▼Follow foodiegogoooo
Instagram: https://www.instagram.com/foodiegogoooo/