娛圈單打︱明明條件咁鬼好　搞到退賽真冇譜

又到年度城中盛事──香港小姐面試時間啦，好事之徒都吼到實，皆因燕瘦環肥、奇人異士、天香國色乜都有齊。外界普遍認為，今屆參選佳麗質素不俗，當中更有一位非常搶鏡，唔止樣貌甜美，仲係區議員添！

嘩，咁破格，得唔得㗎？你知啦，從政者大都予人嚴肅之感。24歲嘅西貢區議員莊雅婷一於少理，以一襲白色氣質長裙亮相，樣貌有幾分似阿嬌，又有幾分似劉佩玥，加上畢業於全國最Top之一嘅北京大學，於是乎，一登場迅即成為熱門之選。

嗱，唔少網民都睇好佢可以躋身決賽，甚至攞埋冠軍，成為「十優港姐」麥明詩翻版。可惜吖，正因為佢嘅區議員身份，令佢承受不少壓力。民青局局長麥美娟就話嘞，睇新聞至知有區議員參選，強調所有區議員不論職業、背景或來自哪個界別，都要遵守區議員履職監察制度指引內嘅要求，亦必須盡責履職喎。

喂，局長開到口，係咪即係擔心，有人不務正業掛住鬥靚呀？唉，後生細女，天生麗質，選吓美啫，使唔使勞煩到局長加把口？果不其然，莊雅婷尋日無奈宣布退選，因為「社會接受程度與設想有差距，影響外界對區議會的觀感」，惟有繼續專心從政啦。

嗯，本欄就深感惋惜囉，明明咁好條件，隨時可以步麥明詩後塵，成為另一位高學歷、知性美貌兼備嘅港姐！當年麥明詩當選後，都講過有興趣從政，甚至選特首添，家陣莊雅婷不過係先從政後選美啫，冇乜大不了。呢，政府成日話要做好青年事務，家陣連選個美都咁多聲氣，年輕人想自由自在展翅高飛，真係唔容易。

東網網站 : https://on.cc/東網Facebook專頁 : https://www.facebook.com/onccnews/