方皓玟重提脫粉事件 被封「烈女」 認冇偶像包袱愛爆粗

方皓玟（小明）早前到新城廣播接受梁兆輝（Brian）主持的《One Music Corner壹角樂》訪問，一向敢言的小明被主持形容為「烈女」，皆因去年發生「脫粉事件」時，她曾跟網民隔空開戰，而小明在訪問中亦無懼舊事重提，並再次堅持自己的觀點。

節目中小明談到歌曲《步兵記》創作靈感，她透露經常選用外賣平台服務，尤其疫情期間，每天都要外賣員送餐上門，「佢哋對我嚟講係半個恩人，冇咗佢哋一日三餐不保，當時生咗小朋友，又未請到姐姐，所以寫咗呢首歌送畀佢哋。」Brian表示網民覺得《步兵記》似是向某外賣平台作告別？小明笑言：「我一唱佢哋就執笠，可能係我唱衰咗佢哋。」

小明透露今年10月會推出全新專輯，同時保留做音樂初心，Brian表示現今做音樂很困難，就連入紙申請紅館檔期，亦要一等再等，好像謝安琪入紙2年仍未成功，小明即表示：「佢等2年，我都等咗4年，同佢鬥等，不過我覺得唔緊要，唔做呢個場仲有好多個場，細有細做，大有大做，做音樂唔係鬥大，係將自己最愛嘅音樂同愛你嘅人分享。」

去年小明因「脫粉事件」跟網民開拖，Brian封她為「烈女」，小明聞言表示：「係呀，我鍾意爆粗㗎，我唔理㗎，我冇偶像包袱，從來都唔覺得自己係個偶像，同埋人有情緒，我都可以去表達；脫粉唔緊要，因為可增可減，好似𠵱家咁，我已經反彈喇，仲多咗好多粉（絲）。脫咗嘅粉，係唔應該要嘅粉，又或者從來唔係粉。」

在快問快答環節，小明表示不懂玩樂器，雖然身為唱作人，她亦沒有慾望去學，「我只鍾意喺腦入面創作一啲無中生有嘅嘢，就係我最大興趣，我鍾意由冇到有嘅過程。」

（即時娛樂）