《女神》GM、Sophie延續世紀之吻　慶功宴再連環錫足10秒

TVB《女神配對計劃 最後告白》昨晚（9月14日）播出最後一集，5位女神及求愛勇者們，昨晚與幕後工作人員食住飯睇大結局。當大家齊齊見證葉蒨文（Sophie）與曾展望GM的甜蜜世紀配對時，全場陷入「狂喜之巔」。

5位女神中的3位女神葉蒨文（Sophie）、梁敏巧（Maggie）及羅毓儀（Yuki）成功與心儀求愛勇者曾展望GM、劉啟進（Matt）及林俊其（Kris）配對成真正CP，當中GM在節目中向Sophie連講三次「我愛你」，以及最後來個抱頭式的霸道總裁式「世紀之吻」，再加Sophie興奮到忘形的「開心揼地尖叫」，立即成為熱話。而兩人配對成功後，Sophie主動提議GM玩「同心鎖」：「呢幾個月我哋都經歷咗好多嘢，我好想同你寫低我哋嘅感想，跟住喺度留低一個回憶。」Sophie選擇寫下的，是她在第一天海選時說過的霸氣Bite：「我唔需要嗰5秒」；至於GM寫下的則是一生不變愛的承諾：「你係第一個，（亦係）最後一個我會想用盡全力保護嘅人。」

而在昨晚舉行的慶功宴現場， 3對成功配對的CP，以不同形式進行「愛的官宣」。GM與Sophie應全場要求即場還原世紀之吻，原本GM有點害羞、不斷採取拖字訣，但最後敵不過全場起哄，「10秒！10秒！」，GM最終捉實Sophie雙臂，二人開始在熱鬧的10秒倒數聲音下錫錫。而當倒數至3時，Sophie突然向後縮兼怕醜地雙掩面，獲監製起哄大叫：「要重頭嚟過！」GM聞言搞笑崩潰大叫：「夠喇！」可惜還是被監製再三要求redo，最終GM搞笑向監製下戰書：「你再講我錫你呀！」。最終GM再度主動捉實Sophie手臂並吻向Sophie額頭，並於極短時間內連錫4吓，此時監製又起哄：「錫埋塊面啦！」GM亦「順攤」地連錫Sophie面珠仔4吓。

眾人睇完大結局後，再前往After Party。而在直播期間，大家又再起哄大叫GM、Sophie錫錫，被起哄之聲吸引入鏡的Sophie，隨即搞笑地大叫：「GM，過嚟！」之後再搞笑地「霸氣捧」GM面，並「強行」吻向GM面珠，成功引起全場起哄，受寵若驚的GM更表示要「飲水定驚」。之後，二人又徇眾要求合唱GM海選時的面試歌曲《情非得已》；期間二人被起哄拖手，結果因為GM太害羞，最後又是要Sophie主動伸出玉手讓GM拖。

Sophie接受娛樂新聞台訪問，被問到為何在「最後告白」中「一秒轉身」鎖定GM，她笑言：「因為由開始到依家都考慮咗好耐啦嘛，咁我覺得我個人就係：『係就係，唔係就唔係！』決定咗就做囉！」GM則坦言未被揀中一刻，心情都依然忐忑：「我都冇乜心情睇佢哋（其他求愛勇者），我都囉囉攣……其實（我）都唔係講咗好多（嘢），因為我（當時）好亂。」Sophie：「其實頭先有all in 嘅感覺。」另Sophie及GM還透過tvb.com甜蜜謝票，Sophie：「我一開始知道要做真人騷呢，就已經想送呢份禮物畀你哋啦。就係『真』！的確有啲戀綜係有劇本嘅，咁我覺得自己作為一個Artist，送畀觀眾嘅嘢就係真實感。所以全程我都堅持係……真實咁去感受，將自己成個人揼曬落嚟嘅，我希望你哋（觀眾）會鍾意我送畀你哋嘅呢份禮物，多謝你哋一路支持！」。