香港美食：【YouTuber滴妹手搖店「再睡5分鐘」確認開第二分店！米芝蓮認證飲品！即將登陸港島】

更新於 03月21日18:24 • 發布於 03月21日10:23 • 香港人遊香港

香港美食｜滴妹手搖店「再睡5分鐘」宣佈開第二分店！

香港美食｜今個月香港手搖飲品市場再有大動作！由台灣知名Youtuber滴妹主理嘅台灣人氣手搖飲品店「再睡5分鐘」，喺網上公布即將進駐灣仔開設香港第二間分店。對於第二間分店嘅詳細資訊，包括具體地址同開幕日期，品牌方面表示稍後會再作公布。不過以品牌喺旺角分店嘅反應來睇，相信灣仔分店開幕之時都會引起另一番排隊熱潮。品牌方面同時表示歡迎本地加盟，相信喺可預見嘅將來「再睡5分鐘」會喺香港開設更多分店，好令人期待！

▲ 「再睡5分鐘」喺2020年5月喺台北開設創始店，之後喺台灣各地開設多間分店。

▲ 品牌最大賣點係採用米芝蓮認證嘅鮮乳，主打嘅「棉被午茉綠」同「棉被日安紅」兩款飲品，都係以厚達3公分嘅綿密奶蓋作招徠，成功打造出獨特口感，深受年輕人歡迎。

▲ 品牌今年成功登陸香港，第一間分店選址旺角，開業期間更邀請到滴妹親身來港宣傳，引起極大迴響，開業後持續出現大排長龍嘅盛況，等候時間最長更達數小時。

▲ 品牌喺網上多次歡迎香港本地老闆加盟，睇嚟好快就會喺香港各區見到佢嘅蹤影。