方泳琳被怕醜B俘虜　挺肚宣揚絕不棄養

「籃球女神」方泳琳出名愛心爆棚，試過挺身拯救繁殖場貓咪，又做「暫養父母」照顧動物BB，現時一屋9隻毛孩，當中「新成員」唐狗Jennie原本只是暫養，但相處兩星期後難捨難離，最終決定領養。即將做媽咪的她，希望以身教宣揚遵守愛的承諾，不因懷孕而棄養。

方泳琳2023年底與拍拖兩年的前甲一籃球員陳張敏結婚，現時懷孕近8個月，日前她與丈夫帶唐狗女Jennie到寵物友善餐廳，未滿周歲的Jennie性格怕陌生環境，坐在寵物車內有點怕醜。方泳琳透露原本只是暫時照顧Jennie：「狗BB好需要照顧，原本係暫養，但有人想領養時，我同老公唔捨得佢走，考慮咗一晚就決定領養。」養狗逾19年的她，指Jennie特別嗲及黐身，去年12月狗狗到家時她已懷孕，未知狗狗是否也感受到她有BB。

繁殖場救10貓

現時家中共有4狗5貓，5隻貓咪分別是英國短毛貓及異國短毛貓，全部領養回來，方泳琳試過在繁殖場救出10隻貓仔，笑言當時「先斬後奏」，沒有通知丈夫便將10隻貓帶回家，幸好數日內全獲朋友領養：「除咗緣分都要睇能力，好彩住元朗獨立屋有兩層高，之前我有兩隻狗唔啱，可以將佢哋分開兩層生活。」

她希望宣揚不要棄養的正面訊息：「養小動物係一世嘅承諾，唔好話動物污糟或敏感，呢啲係藉口，BB都未出世，若果將來BB真係好嚴重敏感先再諗方法解決，唔好一有BB就棄養。之前我識個朋友係咁，覺得佢好似背叛動物，因為狗狗嘅世界只得你一個。」9隻毛孩的糧食和補充品月花五、六千元，她堅特為狗狗提供生肉，認為只要吃得好，病痛便會減少。

東網網站 : https://on.cc/東網Facebook專頁 : https://www.facebook.com/onccnews/