陸詩韻冇拍拖專注工作　關寶慧舞台意外仆低勁醜樣

由美女廚神蔣怡任主持的HOY TV全新飲食競技節目《領廚爭霸戰》每集都會邀來不同嘉賓擔任星級評審，今次的嘉賓是關寶慧和陸詩韻，關寶慧因為是第一次做評判所以感到好緊張，她笑說：「我都唔知點解咁緊張，又唔係我參賽，其實我本身乜嘢都鍾意食嘅，喺我人生中，擺唔到落我個口嘅嘢係少過10樣，所以我好慘，成日都唔可以食嘢要keep fit，而我對食物嘅要求就係要原汁原味，賣相靚唔靚就冇所謂！」正忙於舞台劇的她，揚言要好好保重身體，自揭之前在舞台上跌倒，「之前好核突咁，喺個舞台上面仆低，成個人飛咗出去，勁醜樣呀！依家仲腫腫哋，應該係骨裂，好彩冇移位，早幾日拍戲又搞到成隻手傷曬，我啲手手腳腳經常處於受傷嘅狀態，好奇怪。」

而久未露面的陸詩韻（Sharon)原來是無飯煮婦，對煮食零經驗，笑言所以廚房好乾淨，保持全新的狀態，「我覺得我有啲變態，我完全唔享受煮嘢嘅過程，但係好享受洗碗，其實我係一個好老婆嚟嘅，試過喺日本我同媽咪一齊煮嘢食，我將鹽同埋糖撈亂咗，但係唔係我問題囉！啲糖點會係粗粒㗎？所以一定係啲糖嘅問題，唔關我事！哈哈哈！」

Sharon透露剛搬屋，好享受當下的獨居生活，因為她習慣半夜起床寫低一些想法，以前怕嘈醒家人，現在感到自由自在，不過有時都會感到孤獨，幸好有愛貓陪伴。問到拍拖，她表示要看緣分，「冇拖拍咪專注工作，如果有拖拍，可能我就唔做嘢㗎喇！」早前在網上分享一段擇偶條件的影片，Sharon明言外表不重要，有肚腩、沒頭髮及矮過自己也無問題，她說：「我覺得孝順係最重要，孝順嘅人壞極有個限度，呢個係我嘅首要條件，錫我就係必需㗎啦！外表方面起碼要乾淨整齊囉！如果識得煮嘢食就更加加分喇！」

東網網站 : https://on.cc/東網Facebook專頁 : https://www.facebook.com/onccnews/