Nancy Kwai再次推出抒情作《Let go》　揪心唱出分手後的煎熬

事隔一段時間，Nancy再次推出抒情作《Let go》，揪心地唱出分手後所面對嘅煎熬。

「三天 好好包紥就過去 世上存在渴望 無法爭取」

失戀第三天，我地尚未接受到事實，渴望能夠重修舊好，但彷似再無可能，只能獨自傷心，自我安慰。到第二十一天， 一切塵埃落定，開始在痛心中重新習慣照顧自己。頭兩段已經寫出初分手時所經歷嘅轉變，感同身受，心碎動容。

「三週 剛好一個習慣了 結局描畫太白 全已分曉」

依段相戀時光的確短暫又無法再經歷，但最少曾經快樂過，可以把回憶長留腦海，應該放開時就要放開，將重心放返喺自己身上。一次分離唔代表你唔好，只係代表彼此唔合適，你永遠都有被愛嘅資格，無謂因為一個唔重視你嘅人而沉淪苦海，愛人前要先懂得自愛。

「應該放開時請放開 應該放開時謹記自愛」

然而，要放下一個你深深愛過嘅人，就算明白所有道理，要真正做到又談何容易，內心仍然想念依個傷害自己嘅人，甚至唔想move on。有咁嘅思緒其實相當正常，畢竟你用心愛過，唔可能話絕情就絕情。

只能用時間過渡情緒，走一趟艱辛嘅let go過程。由否定沮喪到慢慢接受，當中要反覆無數次，可能會走回頭路，甚至想放棄一切，異常難受。不過，只要勇敢地撐住，重新建立自己嘅支柱，讓感情隨時日變淡，終會走出低谷，更堅強地迎接下一段關係。未來定有更適合更愛你嘅人等待著。

「眼淚要留給肯拭抹的情人 他於轉角未來」

而MV拍出一段療傷旅程，由開初崩潰絕望，無法正常生活，及後慢慢重拾自我，搵返快樂嘅感覺，但回憶依然會浮現，內心掙扎交戰，最後嘗試放開對方，放過自己，令人心酸。

「就算得到的開心太短 亦算開心得真摯別怨 距離舊愛亦已很遠」

Nancy同甄敏延依個組合實在太厲害。由《You took my breath away》到《Never mind》再到《Let go》，三首作品同樣以溫柔聲線配上傷感歌詞，直中內心，聽聽下就會跟住傷感，勾起各種情緒及回憶，同時帶到一點安慰，百聽不厭。

情歌以外，Nancy亦開始作出不同嘗試，好似《Out of the blue》充滿活力同新鮮感，睇到佢嘅進步同可塑性，絕對係我近年最喜歡嘅新人女歌手，未來期待佢帶更多驚喜比一眾樂迷！

「崩塌的理智 一堆破碎脆弱 是愛」

點樣先算let go？係將所有回憶一下子埋藏，當從來無遇過依個人？亦或將回憶存起，永遠放對方喺心中？其實並無標準答案，最重要自己活得安好。

最後，當一段關係結束，無論你多愛對方，放低定未放低，切記要先自愛🫂

《Let go》 Nancy Kwai
作曲：齊樂平 / 甄敏延
作詞：甄敏延
編曲：Patrick Yip
監製：徐浩

「應該放開時請放開
應該放開時謹記自愛
眼淚要留給肯拭抹的情人
他於轉角未來

應該放開時請放開
應該放開時請勿沉落在情海
一次的錯愛 不阻你到後來 被愛」

▼Follow hkpopculturelover
Instagram: https://www.instagram.com/hkpopculturelover/