What Jennifer Did｜從加拿大女兒自導自演謀殺父母案中　看移民怪獸家長的悲劇與惡夢

（本文獲原創者授權轉載。文章題目由LINE TODAY編輯所擬，原題為：移民怪獸家長的悲劇與惡夢）

早排無意中响網上睇到《Netflix》一套紀錄片《What Jennifer Did》嘅預告，內容關於十幾年前响轟動加拿大嘅女兒罪犯自導自演謀殺父母案。影片下個月先有上架，好奇心驅使下，睇咗呢單案件嘅資料，恐怖嘅唔係個女冷血嘅行動，而係一個移民怪獸家長嘅悲劇同惡夢。

故事主角係典型移民第二代Jennifer Pan，父母係越南華僑，七十年代越戰成為難民，輾轉移民到加拿大生活，去到加拿大先認識然後結婚，生咗大女Jennifer Pan同細仔。Jennifer Pan嘅父母非常勤力响當地工廠工作，為咗仔女教育嘅亦都極之慳儉。

同時，Jennifer Pan嘅父母亦都同大部份華僑家長一樣，對仔女嘅期望非常高，管教異常嚴格，結果就種下呢悲劇嘅禍根。Jennifer Pan四歲嘅時候就開始學鋼琴同花式溜冰，唔係學下玩下咁簡單，係每日放學開始，學完仲要練，直到夜晚十點，然後返屋企做功課，十二點先瞓覺。原因係Jennifer响小學嘅時候攞過獎，爸爸覺得有「潛質」，所以希望個女可以向奧運進發。

响小學嘅時候承受呢種壓力，令Jennifer出現有自殘傾向。唔知係催谷過度還是咩原因，爸爸嘅溜冰夢因為Jennifer嘅膝蓋韌帶撕裂啲小學階段就被迫放棄咗。怪獸家長呢回事，當然唔只體育彈琴，仲有學業，响Jennifer爸爸眼中，攞A係唔夠嘅，個女係要所有科目都要最高分，然後入最好嘅大學（佢地嘅眼中即係University of Toronto），畢業之後要從事醫療行業，收入穩定（下删三百字）。為咗Jennifer長專心學業，Jennifer嘅父母從來都唔比個女同朋友出街，亦盡量唔參加課外活動，所以由小學到中學，Jennifer基本上未試過去同學仔屋企play day，更加唔會有sleep over。

Jennifer响小學嘅成續原本係班中前列，但去到中學就符合唔到父母期望，除咗音樂科之外，無論點努力大部份學科都只能夠攞B咁上下。為咗令父母安心，Jennifer就展開咗一個跨越接近十年嘅大話，亦係故事悲劇結果嘅開端，Jennifer用學校嘅舊成績單偽做自己科科攞A嘅成績同父母交代。

Jennifer高中嘅成績並唔係地底泥入唔到大學咁差，只不過唔係爸爸要求科科攞A，然後直入University of Toronto。事實上，Jennifer高中嘅校內成績，已經令到Ryerson University比咗個offer，佢當時同父母講，成功入讀Ryerson University的話，會試下兩年後轉去University of Toronto。

可惜嘅係Jennifer嘅成績最終炒車，唔到Ryerson University嘅要求，原因可能係當時認識咗男朋友Daniel Wong（案中另一個被判終身監禁嘅被告）。連大學都入唔到，Jennifer對父母講嘅大話就就越講越大。

首先係偽造成績同埋入學信，仲同父母講自己攞到獎學金，叫爸爸買參考書，開學之後每日如常「返學」。實際上，Jennifer除咗教琴同做兼職賺錢，然後去圖書館揾大學課程嘅資料，目的係寫筆記扮有上堂向爸爸交代，期間繼續同兼職販毒嘅Danial Wong交住。

咁樣就呃咗兩年，到咗「轉校去UT」嘅時候，個大話仍然繼續，Jennifer同父母講希望住近學校，所以希望搬去同父母認識嘅朋友屋企住，實際係同男朋友同居。到「畢業」嘅時候，佢成功呃父母話大學畢業典禮唔夠入場券。

「畢業」之後佢同父母講，聲稱自己响醫院揾到學科相關嘅義工。但因為父母發現佢既無制服，又無職員證開始懷疑。爸爸先聯絡Jennifer聲稱同住嘅朋友，然後親自去醫院揾個女，對質之後終於知道個女呃咗自己十年。

爆鑊之後，爸爸有段時間趕咗Jennifer出門口，不過响媽媽求情之後就比Jennifer返屋企住，不過就有嚴格嘅條件，首先迫Jennifer同Danial分手，然後要重讀高中考大學，屋企唔可以用手機電腦，媽媽長期監察Jennifer响屋企嘅一舉一動，要留意當時Jennifer已經24歲，又要面對返中學時代嘅嚴格看管。

2009年，即係爆鑊後幾個禮拜之後，Jennifer响Facebook出咗呢個post。

“Living in my house is like living under house arrest.. No one person knows everything about me, and no two people put together knows everything about me…I like being a mystery.”

廿幾歲當然唔係迫就會分手，實際上Jennifer同Daniel仍然保持聯絡，但因為Daniel Wong同另一個女仔交往，就令到Jennifer「黑化」，亦都將佢嘅大話習慣推到另一個極端，聲稱Daniel Wong嘅新女友揾人入屋侵犯自己，希望令Daniel返自己身邊。

到咗2010年，Jennifer腦海出現一個恐怖想法，就係買兇殺自己嘅爸爸。呢個唔係暗黑幻想咁簡單，佢聯絡中學時期嘅壞同學，希望比千五加幣對手响停車場殺害自己嘅爸爸，不過呢個舊同學即時拒絕呢個咁癲嘅要求。

之後Jennifer聯絡男朋友Daniel，兩個人諗到一個更進一步嘅計劃，就係揾職業兇徒殺死Jennifer嘅父母，自導自演包裝成劫案，賣咗父母間屋承繼遺產，然後兩個雙宿雙棲。因為Daniel Wong响中學同大學期間有兼職賣大麻同軟性毒品，的確有呢類人脈，結果真係揾到三個願意收錢（一萬加幣）做嘢嘅兇手。

2010年11月8號就係Jennifer同Daniel呢個恐怖計劃實行嘅日子，Jennifer聯絡三個兇手去佢屋企人屋行劫，先開槍射殺Jennifer嘅媽媽，然後就向佢嘅爸爸開槍，當時Jennifer係响屋內嘅。跟住三個兇手做埋場戲順便搜屋內嘅錢同貴重物品離開。

之後Jennifer就打電話報警，好驚慌咁話屋企被人屋，自己同父母被賊人綁起，父母被殺害。本來警察無懷疑Jennifer，而且佢落口供嘅時候都交足戲。但後來警察調查之後發現好多細節有可疑，最重要嘅係爸爸雖然頭部中槍，但被醫生救返，醒返之後記得Jennifer同兇手對話態度非常友善。

最後Jennifer承認所有嘢都係有份策劃，不過堅持話案發前已經要求取消行動，只不過三個兇手私自行動，經審訊後結果Jennifer、Daniel同三個落手嘅兇徒响2014年被陪審團判一級謀殺。

之後Jennifer嘅爸爸接受訪問，話自己唔敢再返間屋，而且間屋係兇案現場，亦都賣唔出，個女做咗個嘅事，自己乜都無晒，希望Jennifer有一日可以洗心革面。

其實，Jennifer固然係錯都無得拗，但呢對怪獸家長何嘗無責任？

#怪獸家長的惡夢與悲劇

作者：Goodbye HK, Hello UK

▼Follow Goodbye HK, Hello UK
Facebook: https://www.facebook.com/goodbyehkhellouk
【想在LINE TODAY刊登你的文章或影片，歡迎聯絡我們】