海洋公園坐過山車 湯駿業跌電話報警　跌落路軌隔日定位現元朗 工人拾獲帶返家後交警署

舞台劇演員湯駿業（Ah Dee）於10月31日晚上萬聖節期間前往海洋公園遊玩，其間乘搭「動感快車」時電話跌落過山車路軌。他昨日（11月1日）在多個社交平台發文表示，當時在下車位置意外跌手提電話，「我睇住佢跌咗落路軌，我立刻同樂園職員講」。惟因設施仍在運作，他被安排到一旁等候，並被告知閉園後方能尋回，隨即按指示到失物認領處報失。

湯駿業稱，翌日早上透過後備裝置使用「尋找iPhone」功能時，發現手機位置已轉移至元朗一帶。他形容當時心情，「唔開心到憤怒到失望，點解iPhone都偷……咁大間海洋公園，係咪就咁話幫唔到就算？」遂向警方報案。

其後事件出現進展，他昨日下午收到警方通知，指有工人於閉園後在路軌位置拾獲電話，因當時園內已無職員，工人遂將電話帶回住所，並於翌日到機場上班時交到機場警署。

湯駿業昨晚10時許更新帖文表示已領回電話，「啱啱去咗機場警署攞返個電話，要多謝幫我手搵過嘅所有人」，並上載電話照片。相片所見，電話屏幕出現多處裂紋但機身仍算完整。他形容，「以為會跌到粉碎，而家呢個爆法真係好特別」、「如果爆到咁，佢仲特登幫我拎返屋企保管，真係要好多謝佢」，並稱會再交予專業人士檢查。他透露，跌落後首半小時，友人梁祖堯致電仍能接通。

海洋公園回覆查詢時表示，接獲報告後已啟動既定程序，根據訪客所提供的資料，在懷疑遺失物件地點進行現場搜索及翻查閉路電視記錄；並全力協助警方之調查工作，以及與訪客保持聯繫。現時該失物已由警方處理待領程序。事件並不涉及公園員工專業操守事宜。

港新聞Instagram：https://www.instagram.com/kong.news/
港新聞Threads : https://www.threads.net/@kong.news