何求勇奪香港臥推錦標賽青年組金牌　操練數月由肥仔變身冠軍

自2022年參加試當真《校花校草2022》入行的何求，前年加入鄭中基的「機動娛樂」成為旗下藝人，今日（6日）參與「香港臥推錦標賽青年組59公斤」勇奪金牌，可為送了一份禮物給今個月24號即將踏入22歲的自己。

何求自入行後不乏演出機會，近日ViuTV劇集《翻盤下半場》飾演黃浩然的年輕版，亦有參演林家謙《四月物語》MV。原來他早前為預備今日舉行的「香港臥推錦標賽」，把心一橫操練自己。今日他貼出多張相片，展示努力得來的成果。

何求今日在IG發文表示：「今日9月6日，我第一次自發性咁樣參加咗一個運動比賽。第一次拎到咗一塊金牌。第一次實實在在咁贏咗。由細到大，如果有留意開我嘅人，都會發現我只不過個死肥仔，運動絕對唔會願意做。但自從健咗身之後，好希望會變得大力，好希望身形會改變！」

何求續道：「就係咁，我接觸咗健力……但係好快，由於兩三年前工作發展得唔係太順利，我又變返做一個肥仔。有一日照鏡見到自己點解又肥到咁，諗返嗰陣玩校花校草嘅時候個身型其實幾好睇，突然把心一橫『既然都要減，咁不如比埋賽啦！』就係咁，我就報咗名參加，然後經過咗幾個月，又食唔飽、然後又係咁操野嘅生活，比賽嘅日子終於蒞臨！就係今日，拎咗個冠軍！希望之後可以出國玩比賽啦。」

何求又笑指：「如果有邊位能幹之士，可以幫我喺維基百科加香港臥推青年組冠軍，我會感激不盡！」