Yanny被網民懷疑混亂中遭拍胸　「相信佢冇做你哋擔心嘅行為」

由游學修、許賢、蘇致豪主理的YouTube頻道「試當真」於10月26日，即其成立五週年的日子，正式停止營運。最後一晚以「官方正式結局」為主題在頻道開直播，不同員工相繼發言，最後整個直播長達3小時23分鐘。而最矚目的是在直播尾聲，編劇兼導演盧嘉誼（Ellen）就內部溝通問題公開向游學修反映意見。另外有網民指在最後大擁抱時疑似出現Yanny（陳穎欣）被抽水事件：「我有冇睇錯，最尾個幾秒Yanny後面個阿叔拍佢心口？」

昨日（10月27日）有網民在threads發帖文，寫道：「我有冇睇錯，最尾個幾秒Yanny後面個阿叔拍佢心口？」，另一網民亦寫道：「請問古生（編按：指某員工）有冇野（嘢）講？好明顯掂一掂左（咗）Yanny隻手再打佢心口……Yanny應該都feel到見佢即刻縮左（咗）……雖然執左（咗）笠，但係咪都要保護下自己既（嘅）前員工？」並附上有關片段和標註「試當真」。

Yanny於今日凌晨時分回覆帖文，寫道：「大家先唔好鬧交。首先我好開心見到社會上有人會因為想保護女性，以關心佢哋嘅角度，為佢哋發聲。的確唔係每位當事人都有勇氣同可以好冷靜咁處理到呢啲事。我小時候曾經都發生過，唔開心咗好耐。所以以後，我每次見到呢啲事情，我都會為他人挺身而出，所以我係絕對明白你哋嘅心意。不過尋日嘅情況係相當混亂，大家都相當興奮，所以有少許碰撞都唔出奇。而我同該同事嘅關係亦都係友好，我絕對相信佢冇做出你哋所擔心嘅行為。所以大家唔使擔心。」

該名網民亦回覆Yanny，寫道：「首先多謝 @yannyyc覆我，知道係一場誤會，我係開心既（嘅）。我誤會左（咗）古生，我係到鄭重咁同佢道歉，對唔住。當時係另一個threads見到人懷疑yanny被人非禮，我第一時間係唔信，因為我好鍾意試當真呢個地方，好唔希望發生呢啲事，所以我睇左（咗）段片好多次，睇下係咪俾人撞到之類，越睇越唔舒服，所以冇再睇，等自己消化下，但我當刻消化唔到，仲覺得好嬲，覺得需要出po表達下，因為我覺得點解咁對一個咁好既（嘅）女仔。知道左（咗）係一場誤會我係開心，我對於我出po既（嘅）時候冇好好咁考慮po既（嘅）內容道歉，我亦再次對於誤會左（咗）古生道歉。另外見到網民既留言想回應下：1. 古天樂唔係我老豆，豪哥介紹佢個陣叫佢古生，我先叫佢做古生，唔信可以睇返直播。2. 出呢個po原意上面講左（咗），並非刷流量。」