奄仔蟹蟹膏香滑創意煮法滿足味蕾

發布於 2024年08月29日04:25 • Wendysugar

無錯呀!又去飯堂食飯呀！因為每年呢個時候都是奄仔蟹當造時，今年當然唔例外，又約埋班飯腳去碧儷苑食奄仔蟹，由前菜開始，已經好味到無得彈。就連甜品都有驚喜，今次又成功地增磅，我都無話可說了，實在太好食好難忍口囉。唔講咁多，講吓有乜咁好食先。

四款前菜已好滋味。

霸冷翠鮑魚南非鮑用秘製醬料燜至入味，鮑魚味濃帶溏心，口感軟糯，呢個熱辣辣天氣食就至啱，有點涼透心的感覺。

鹿兒島煙燻黑豚腩來自鹿兒島的煙燻黑豚腩，表面滿佈霜降紋脂肪，油脂分怖均勻，煎香後肉質柔嫩多汁有彈性，煙燻香撲鼻，又唔會太霸道蓋過黑豚腩肉的原味，又不會太油膩，用作佐酒一流。

煎雲南牛肝菌牛肝菌最常見是用作煮餸及煲湯，這道將肉質肥厚的新鮮牛肝菌切成薄片，簡單的以牛油及少許鹽吊味，淡淡的堅果香氣，吃起來口感脆嫩，非常鮮美。

煎釀瀬尿蝦呢個新食法從未過，仲睇得出行政總廚龍師傅，好貼心及花心思，將瀬尿蝦去殼然後釀入蝦膠及豬肉再煎香，入口瀬尿蝦已是好鮮甜加埋蝦膠及豬肉，鮮上加鮮，食得津津有味。

冬瓜帆立貝湯可以話是冬瓜盅的升級版，龍師傅用了四斤的大蜆，8隻田雞煲足一個鐘，最後加埋刺身級的帆立貝，大大隻的入口真是鮮甜無比，湯底鮮香清甜，還有幽香的夜香花，冬瓜肉亦完全入味，一碗下肚，令人心情舒爽，最重要是完全踢走炎夏的煩悶。

岩鹽焗奄仔蟹

以鹽焗方法烹調奄仔蟹，完全帶出奄仔蟹的鮮味，入口有點鹹香，那滿瀉的蟹膏雖然是好邪惡，但實在太鮮味，好難忍口呀! 吃時不妨加埋一杯陳年花彫，與奄仔蟹同吃簡直是絕配。

二味黃皮老虎班以不同的做法，真是雙重的味覺享受，分別是柑桔脆班卷及生炆班骨腩，前者是接近4斤重的黃皮老虎班起肉後，配日本蘿蔔，子薑及青瓜成卷，面層放埋自家製的柑桔醬，將魚肉的鮮甜度全面升級，連平時唔多食魚朋友都話正；後者以生炆的方法，肉質煙韌有口感，最後一定要講的是，未試過全條魚連骨都吞埋落肚，主要是食到咁上下，便會將條連頭炸好的魚骨剪開，入口魚骨連肉香脆，食到大家都舐舐脷，連半點魚骨都唔放過，堅好食。

柑桔脆班卷真是啖啖肉，好味。

實在太跨張喇！呢個7頭花膠扒真是大過塊面，充滿骨膠呀！先用汁料扣到入味，入口花膠肥厚嫩滑，每一口都是矜貴又滋潤，膠質豐盈的花膠更具有滋陰養顏、補腎益精功效，充滿幸福感。還有那肥肥地的東坡肉，又是超級的好味，試問又點忍得住口呢？

7頭花膠扒未切開時, 大件到真是大個塊面，超跨張。

麻辣千頁龍蝦龍蝦最常見以上湯及芝士焗的製法，龍師傅的大膽創新，以台灣的千頁豆腐，配上自家製麻辣醬汁，以肉厚又鮮的西澳龍蝦做主角，龍蝦經過醬汁的洗禮後，估唔到麻辣醬的惹味，更能帶出龍蝦的鮮爽彈牙，還有那千頁，如魚片般的口感，吸收了醬汁的精華，不太油及辣，只是感到非常的惹味，一定要試。

滑捋捋小白兔可愛的造型其實是芒果布甸的可愛版，味道香甜，還有芒果肉，冰涼透心。

燕麥蕃薯這道甜品如反沙芋頭的做法，面層是燕麥粉，內裏是黃蕃薯，入口清甜，感覺上都好健康，不過最重要是沒有半點邪惡感，食得好安心。

同場加映：

《碧儷苑.精點粵菜》花好月圓·月餅禮盒內裏有三款口味，包括了全黃蓮蓉月餅 (70克) 各2個、全黃陳皮豆沙月餅 (70克) 各2個及瑤柱金華火腿五仁月餅 (70克)各2個，最重要是百份百香港製造，依家只賣$268，性價比高。加埋超美的月餅盒令人一見就愛上，食完仲可以當首飾箱放手表及飾物，非常的實用又環保。

碧儷苑·精點粵菜

地址：中環擺花街1號一號廣場1樓

電話：2788 2683