《墨魚遊戲》陸永、洪天明鬥到最後　Lolly Talk「兩姊妹」終極廝殺

由游學修、許賢與蘇致豪創辦的YouTube 頻道「試當真」將於星期日（10月26日）5周年當日停運。而集結100藝人的網上節目《墨魚遊戲》備受矚目，第二輯分為上集《墨魚遊戲2》及下集《墨魚遊戲3》。《墨魚遊戲2》於10月16日播出；《墨魚遊戲3》終局之戰於昨晚（10月23日）晚上10點首播，最高峰有17.5萬人收看觀看，成為城中熱話。

陸永與洪天明憑實力和運氣一起玩到final game，兩人成功在尾二一局晉級時，洪天明跟陸永說：「你好緊要，你嘅運呢，乜都冇做過」。陸永反擊道：「你都唔知我幾多擾亂同埋信心」。而同隊的Stone（林子峰）跟陳健安猜包剪揼前分析對方會出甚麼，因此多次勝出，連領隊伍進入final game。陸永此時得悉Stone是校草，口快快說︰「校草都咁有智慧！」。

之後能夠進入final game「007入子彈」的8位參賽者，包括陸永、洪天明、雞翼、Yanny@Lolly Talk、阿蛋@Lolly Talk、Ming仔、東方昇，以及Stone@試當真。雖然陸永和洪天明雙雙入到final game，但仍難逃被射死的宿命。陸永出局前說道︰「嚟到呢度，其實都好辛苦同好努力，分別喺第三個遊戲完全冇做過嘢晉級，同第四個遊戲都係冇做過任何嘢……或者我話俾大家知，順其自然，隨遇而安，都未必係一個好策略，因為依家輸喇。」

經過一輪互相槍殺後，最後Lolly Talk兩成員Yanny和阿蛋爆冷留到最後，「兩姊妹」在終極廝殺前既感動又激動，在Yanny講明不會開槍的情況下，阿蛋成為終極贏家。