Pony蔡寶欣 悉尼馬前傾一傾：「有諗過不如放棄比賽！」

蔡寶欣（Pony）出戰 831 悉尼馬拉松在即，一切都已準備就緒！由跑步真人 show 到真正落場參加比賽，Pony 仍在堅持跑步，而且賽賽不斷，睇得出真係冇人逼！為求更貼近女跑手觀點及心態作對話，我們繼續找來本地跑步女生杜寶玉（Jade），於 Pony 出發前，大家傾傾跑步經。

跑步的開始

Jade：大家都知道你開始跑步係因為參加電視節目《公司冇逼我跑馬拉松》，完成之後對你嘅人生或者工作有冇帶嚟特別嘅改變？係咪因為呢段經歷，令你對跑步嘅感情加深？

Pony：絕對係！其實拍呢個節目前我都唔算係運動型，多數都係做綜藝搞笑。透過節目，觀眾見到我認真、全力以赴嘅一面，同時自己性格都有好大轉變。以前冇乜規律嘅生活，興趣多但三分鐘熱度，唯獨跑馬拉松令我學識咩係耐性，尤其係長課訓練，又熱又攰都要頂住。結果唔單止完成咗節目，仲令我成個人更有紀律。

以前跑步只係為咗減肥，最多跑 5-6K，第一次報渣打馬拉松10公里時，仲未試過跑過 10K。

成為跑步教練？

J：之後你仲考埋跑步教練牌，點解會有呢個想法？

P： 其實一開始唔係真係想做教練，而係想系統化咁去認識跑步。因為最初學跑步完全靠自己上網搵資料或者問朋友。考教練牌主要係希望用正確嘅方法去理解長跑知識。將來會唔會做教練唔敢講，但至少可以累積經驗。畢竟教練唔同朋友隨便分享，仲要顧及學員目標同安全，責任重大。

路跑 vs 跑山

J：你同時玩路跑同越野跑，自己係鍾意邊樣多啲？

P： 好難二揀一，兩樣我都鍾意。因為本身已經好愛行山，每星期都會去挑戰不同山徑，鍾意喺山上望住風景、放低壓力。其實第一次比賽都係 10K 山賽，落雨濕滑反而覺得刺激，好似打機咁。相比路跑嘅重複動作，跑山有更多變化同挑戰。

對我嚟講，路跑同跑山就好似 Pizza 同咖啡，各有味道。路跑要留意心率、配速，好似自己做自己嘅 pacer；跑山就隨心，可以快可以慢，反而係一種放鬆。

海外跑步嘅震撼與感動

J：你近年有去台灣、日本、紐約跑步，海外比賽有咩特別體驗？

A： 最大感受係「好玩」，亦係旅行嘅理由。我目標係完成「世界7大馬」。香港馬拉松通常係拚時間，過程未必享受；相反紐約馬拉松我完全冇追 PB，因為斜路多，加上時差，狀態未必最佳，結果就用玩樂心態去跑。

紐約嘅氣氛真係好震撼，Expo 開始已經好似嘉年華，比賽沿途觀眾熱情到會派食物支持，感覺係全城慶祝。名古屋女子馬拉松又係另一種體驗，全部跑手都係女仔，好有「Girls Power」嘅感動。

J：邊一條外國賽道最令你印象深刻？

P： 一定係紐約馬拉松。要跑過五條橋，上第一條橋嗰刻已經覺得震撼。平時喺美劇先見到嘅街景，親身用跑步經過，真係有啲唔真實。

即將到來的悉尼馬拉松

J：你即將跑悉尼馬拉松，有咩目標？

P： 計劃頭 30K 跑自己想要嘅配速，之後放鬆完成。因為真正重點係年尾台北馬拉松，悉尼只係優質長課加享受。希望用四小時左右完成，唔好再似紐約咁玩到四個半小時咁攰。

J：訓練上有冇特別方向？

P： 有！悉尼上坡多，我就喺元朗搵咗1K 長斜路做重複衝刺訓練，每次5-6 組。天氣熱到34 度嗰次練15K 差啲喊出嚟，但覺得如果長課都捱唔住，比賽一定唔得，所以死都要完成。而家仲有練食gel，避免腸胃唔適應。

悉尼馬賽鞋與裝備

J：悉尼馬拉松會着邊一對鞋？

P：Puma Deviate Nitro Elite 3 紫色特別版。著過 30K 長課，好滿意佢嘅回彈同支撐。

J：有冇鞋款想推介俾讀者？

P：都係 Deviate Nitro Elite 3。最重要係跑馬拉松一定要舒服，唔夾腳先至會想繼續跑落去。

不如放棄比賽

J：跑咁多年，有冇想過放棄？

P：有呀！今次夏天練馬拉松真係最辛苦，好熱之下我都有諗過不如放棄比賽，當旅行算。但望住手錶紀錄，提醒自己已經付出咁多，只要咬緊牙根再頂幾課就完成到。就係咁堅持落去。

跑步以外的影響

J：跑步有冇改變你喺生活或工作上嘅態度？

P： 絕對有。練馬拉松要花好多時間，令我生活更規律，早上 4:30 起身練習已經變習慣。就算工作時間唔固定，我都會自己調節。跑步教會我「堅持」 – 以前好多嘢都三分鐘熱度，依家反而更有耐性。

台北馬拉松 PB 目標

J：最後講下你年底台北馬拉松嘅目標？

P：當然係 PB！希望可以跑到 3 小時 50 分左右，比之前 3:57 再快啲。

對Pony而言，跑步早已唔只係運動，而係一種生活態度。從一個綜藝節目嘅「意外開始」，到今天堅持不懈嘅馬拉松跑者，Pony 用雙腳一步步走出屬於自己嘅故事。

Please follow Insports Hub on Facebook & Instagram
https://insportslab.com/
FB
https://www.facebook.com/insportslab
IG
https://www.instagram.com/insportslab/