《看我今天怎麼說》劇透影評 一部情感真摯又有意思嘅作品
《看我今天怎麼說》正式上映前已經獲得眾多好評，我睇完後都非常喜歡，係一部情感真摯又有意思嘅作品。
最近突然出現強勁競爭對手，所以大家更要趁早入場支持！
（以下有劇透）
「為何 明明 你似你 我似我 然而 無人願辨別 像負荷」
電影以第一身角度，帶觀眾進入聾人獨特嘅世界，講出一個關於自我身份認同嘅故事。無啲刻意煽情嘅情節，就用最日常平淡嘅生活，讓觀眾感受佢地每日面對嘅難處。
過往嘅影視作品都不乏聾人角色，但《看我今天怎麼說》係第一部電影如此深入地探討佢地喺香港嘅處境，非常難得。
「What if 我會似個造夢家 What if 又被罵造夢坐在家」
聾人喺依個社會立足，做所謂「正常人」，難關比想像中更多。就算係最基本嘅溝通交流，看似簡單不過嘅事，都要從小花加倍力氣學習。
即使社會有種種支援，但要聾人們完全融入始終係相當困難，個份同大眾嘅隔閡仍然難以被清除。係要喺其他聾人身邊先可以自由自在，揾到真正嘅歸屬感，無奈但寫實。
「何妨鬆手 不怕 還原率真 不怕 從前遺憾的語氣 無窮傳達裡沒有顧忌」
劇情以外，電影對聲音嘅處理稱得上係世界級，以唔同角度表達聾人嘅聽覺世界。有時代入角色，幾乎完全寧靜地感受身邊事物；有時又出返現實，睇住聾人們無聲地交流；有時甚至連做手語都無字幕，讓觀眾一同用「外人」身份睇佢地如何「說話」。原來一套戲唔太需要對白，都可以完整地表達內容。
當中有兩幕我特別深刻。首先係子信喺大排檔用手語教手語，觀眾同素恩一樣，唔靠聲音同課本，一步步學習，原來手語並唔係想像中咁困難同抽象。
另一幕係素恩差啲喺大海浸親個段，所有事喺一片平靜中發生，只聽到平和嘅海浪聲，但實情係素恩性命危在旦夕。整個氣氛有種難以言喻嘅震撼，充份感受到聾人嘅無助。
「為何 明明 你算愛我那個 同行 人前 未自在 站或臥」
三位主角縱使同為聾人，但對人生卻有截然不同嘅選擇。
子信一直堅持過寧靜嘅世界，甚至對社會有份不忿。旁人可能覺得佢太倔強，但背後係因為佢一直以嚟受到不公對待，日積月累而成。手語唔單止係母語，亦係身份象徵，早已同佢密不可分。因此，每當有人唔尊重手語，子信嘅反應係特別強勁，心中無非想保護自己，保護自己嘅群體。
素恩從小過住主流嘅生活，看似一帆風順，但其實內心隱藏眾多傷感，喺畢業禮同職場都感受到佢嘅孤獨感。當面對踏入社會嘅辛酸時更異常無助，係接觸手語後先揾到歸屬。鍾雪瑩將整個角色轉變演得細緻動人，得到金馬影后絕對實至名歸。
Alan係幸運嘅一位，同聽人相處依然舒適自在又無隔閡，可以話成功融入社會。我好喜歡佢最後除低接收器，感受近乎沒有聲音嘅世界後，最終都決定戴返，簡單嘅動作代表咗佢嘅選擇，佢始終喺主流社會更加搵到歸屬感。吳祉昊作為新人演員有如此成熟嘅演出，前途一定無可限量。
「前途怎界定不必照那意思 一切問心都可以 何妨誠實換新開始」
總括而言，《看我今天怎麼說》係一部難能可貴又用心嘅電影。感謝黃修平導演讓大家深入了解手語，了解整個群體，更感謝你製作出依部好電影。
「不算特殊 我會講 喜歡的結語」
最後，對住聽障人士，我地未必做到好多，或者比多一份尊重，已經係對佢地最大幫助。
▼Follow hkpopculturelover
Instagram: https://www.instagram.com/hkpopculturelover/
留言 1