娛圈單打︱甩掉渣男覓真愛　好過𢱑住棵爛菜

高畑充希擺脫花心渣男後遇上岡田將生，翻開人生新一頁。

尋日講到，日本鹽系男神坂口健太郎背住同居4年女友，劈腿「肉食女」永野芽郁，形象重創。神通廣大嘅網民整理出呢對男女偷食時間線，發現當中又同其他人有高度重疊，坂口及芽郁皆被指同一時間一腳踏三船，獲封新一代時間管理大師！

嗱，早在2020年，坂口已跟另一人氣女星、晨間劇《當家姐姐》女主角高畑充希拍拖，期間偷食永野芽郁惹怒正印，2021年分手。現在又被揭發跟化妝師女友同居4年，即係同年開始關係。究竟係無縫接軌，定係背住高畑以至芽郁跟化妝師交往，耐人尋味。

當然，芽郁姐絕非吃齋的，同坂口第一次玩完後，2022年再喺名牌活動重逢，癡男怨女一撻即着，好快就重燃愛火；同年底芽郁姐睇中已婚嘅田中圭，大玩不倫戀，同時又跟韓星金武俊搞曖昧，一女周旋三男。坂口則繼續同化妝師同居，大享齊人之福。

媽呀，貴圈真亂！正因為呢件錯綜複雜嘅偷食事件被揭穿，外界深深感嘆，高畑充希走得快好世界！呢位玉女明星，當初抱住結婚為前提嘅認真態度跟坂口交往，雙方早已見過家長，點知男方原來係食家，逢女必啱。高畑死心分手，旋即迎來好結果。

高畑去年跟靚仔男星岡田將生合作拍劇，日久生情，去年底閃婚！兩個月前公布懷孕好消息，預產期為今年底。正所謂塞翁失馬，焉知非福，撇甩渣男，碰上真命天子，真係好幸福嘅呢！講真，偷食只有0次同無限次之分，男又好，女又好，呢鋪癮好難戒。不妨睇吓坂口同芽郁姐，幾時又被踢爆偷食第二個啦！

娛樂