「熱氣球阿媽」回應陳佩思零食店事件　稱改電話因遺失手耭

「熱氣球阿媽」菠丹(Botan)因早前「熱氣球事件」受訪而爆人氣，follower大增。不過之後關於她的負面傳聞陸續浮面，當中包括涉「playgroup走數」及「借錢唔還」，更被藝人陳佩思(Pancy)指曾合夥經營零食店，最後失踪兼改電話失聯。日前她就接受YouTube頻道「會八十」訪問，以《被討論的勇氣》為題逐一解釋。

菠丹指當時和Pancy合夥經營零食店生意很差：「你要知道零食呢樣嘢，可能係$10，可能得一兩蚊賺，我哋嗰陣時講緊最低紀錄，係$109蚊一日，嗰一日得幾蚊雞賺，計埋燈油火蠟，雜費一個月可能係兩萬幾。當其時間舖喺瓊華中心頂樓，人流好少好少。大家都心知肚明，嗰陣時係窮到點呢？埋完貨出去，應該係有個現金再去訂貨，我哋係冇錢到去一個地步，要行去隔籬街，要去零食店買10包8包桃哈多擺喺舖頭。」最後失踪，她承認是自己處理得不好：「其實Pancy，我可以斬釘截鐵咁同你講一句，我好清晰話畀你聽，我冇攞過舖頭一毫子，我亦都冇呃過你任何嘢，但係有一樣嘢我做得好差嘅，我承認我係錯嘅，就係當其時我走之前冇話畀你知，但係當其時幾個月我同你都冇乜點返過公司，呢個係我嘅疏忽，我要同你講聲對唔住。」

至於被指常常改名，她解釋：「到今時今日，我都係用緊Dreamy呢個名。由2015年到而家，我又冇改過電話號碼，其實所有人都搵到我。點解叫菠丹，其實我講過，係日文名。當其時有隻公仔IP叫菠丹，所以我喺個page入面叫菠丹。」而轉電話失聯：「唔係轉電話，而係唔見咗個電話，唔知俾人偷咗定跌咗，喺嗰度冇理由買返張機票，喺香港就補領張卡。喺嗰個咁差嘅moment，我淨係想快啲令自己有返信心，有返希望。」

說到Marketing公司拖糧部份，她說因為partner「前前後後攞走晒公司嘅現金」：「加埋佢之前借我嘅錢，total 58萬。」當時她和一位partner經營Marketing公司：「當其時，除咗零食店之外，仲有個partner做保險，開咗一間Marketing公司，開始嘅時候生意都OK，收支平衡有少少利潤，叫做有錢賺。後尾有一次我哋接到一單job返嚟，嗰單job係一個朋友，佢接受咗爸爸一間玩具公司。佢就想整一個IP，見人哋印一隻公仔係產品。我第一時間就諗起Josephine，我覺得佢係一個好好嘅設計師……上期已經俾咗錢，我唔記得咗，中間仲有啲零散嘅數係點樣要入俾佢。到尾數嘅時候，phase 2我哋要收錢，但係突然之間我哋呢個project係終止咗，但係phase 1我已經請咗一班人返嚟搞呢個project，但係你知，phase 2終止咗，佢亦都冇再入錢俾我哋。」她又承認自己處理不當：「我要向Josephine道歉，呢件事係我處理得唔好。」但她又指現在已經找到那partner：「另外Josephine嗰度，我都好想同你處理嗰個尾數，另外我都搵到當年partner，佢願意承擔返所有嘅錢，全部會退返俾你，佢願意承擔責任。」

主持人阿Bu提到她的partner「穿櫃桶底」是商業罪案行為，菠丹則回應：「冇諗過做呢件事，喺我心目中佢係因為佢財政出現咗問題，而佢需要攞嗰筆錢，佢唔想破產。我當其時冇諗過要報警或者乜嘢，呢個係事實。」
最後，她指如覺得她欠人錢，她都樂意解決：「冇呀。可能我playgroup入面有冇人未退錢呢，我就唔敢講，因為佢哋要搵我先知。我好肯定財務啲嘢我冇記錄喺手，所以我成日喺網上面咁講，如果有人未退款請與我聯絡。我亦都有晒紀錄，搵我嘅人我即刻退……如果佢哋有乜嘢係覺得我做得唔好，我要去補償俾你哋又好，負責又好，你直接DM我，其實我真係，我係一個絕對願意承擔一切責任嘅人，可能我後生嘅時候有做得唔好嘅地方，年少無知，乜都好，總之今時今日嘅菠丹可以答你一句，只要你嚟搵我，係合情合理有證據，我真係爭你乜嘢，我一定俾你。」