Mr.多倫多開騷被轟失準　Ronny解釋Dash患癌後遺症

於2008年加入香港樂壇的5人樂隊Mr.，近年屢次傳出隊員與主音Alan（布志綸）不和，於2019年舉行紅館演唱會後，Mr.於去年改以獨立樂隊身份發展，但布志綸已不再是成員，現有成員包括Ronny（黎澤恩）、MJ（譚傑明）、Dash（譚健文）及Tom（杜志烜）。改為4人樂隊的Mr. 早前到加拿大多倫多舉行「輕狂歲月音樂會」，不過被當地歌迷發長文批評，直指「如果大家今晚係有免費飛入去睇，條氣都應該順少少。如果你係比（畀）$100入去聽，真係唔知講咩好。」，引來結他手Ronny親自回應。

日前，有一名有份入場觀看Mr. 多倫多音樂會的歌迷在threads發文，寫道：「首先唱歌方面極不專業，都唔知有幾多首真係由頭唱到落尾。到下半場好多歌都唱唔到，要後面嗰位和音去補位。重要出到聲話叫大家幫手唱。大佬我入嚟係睇你表演，如果我自己唱，去唱K都得啦。」該名歌迷又提到Tom和Ronny的樂器音效都失準：「大家都知係少左（咗）Alan，但都願意入去聽下支持下。咁樣嘅演出真係接受唔到，假假地Mister都上過4次紅館，咁樣嘅質素演出過到自己？」

結他手Ronny在幾日後在帖文下留意，寫道：「首先，我想認真多謝你入場支持，沒有主音狀況下你都支持，感謝你。我冇太多補充，做得唔好既（嘅）我地（哋）繼續改善，包括rundown／現場balance／現場水準等等，因為講什麼去解釋都會有人出嚟反駁，但我們絕對有空間改善，每一個人都有。」

Ronny再解釋隊員情況：「我留言主要想講一樣野（嘢），Dash係一個鼻咽癌康復者，佢依家每隔一陣間醫生就要咭（拮）穿佢耳膜，去排走入面積水，多倫多演唱會完結喺後台，我第一件事就係問佢你頂唔頂到，因為我知佢喺台上面唱歌每隔幾首，啲水就會灌入去喉嚨。小弟不才，冇辦法分擔唱歌，因為應該會俾你吊得更加甘，另外嗰兩位事實上亦都係唱起上嚟冇佢咁好，所以佢要承擔唱歌、彈低音結他，仲要台上面主要負責講嘢。你真金白銀俾錢入嚟支持，我只想講我哋冇揸流攤，呢個係期望嘅落差，亦都係我哋暫時冇辦法解決。最重要一點喺（係），我哋絕對唔會話邊現場表現失準係佢嘅問題，特別係唱歌，有任何閃失四個一齊孭。可能我哋想俾你睇到嘅就係呢種精神，可能咁樣就係Mr.」。