關智斌突襲Cantonpop Party　全場大合唱《死性不改》

關智斌（Kenny）將於下月開騷，近日活躍於各大YouTube頻道宣傳，昨晚（30日）驚喜現身由「節拍星期五」（BEAT FRIDAY）做搞手的Cantonpop Party，全場觀眾即陷入瘋狂狀態，歡呼聲幾乎震爆場！當晚氣氛High到爆，絕對是一個星期五晚的完美狂歡。

Kenny一出場，主腦人波盛立刻為他送上專屬Medley，一次過串燒他的經典歌曲《眼紅館》、《La La世界》及《死性不改》等。音樂一響起，馬上進入大合唱模式，全場化身Kenny的超級Fans，每首歌都滾瓜爛熟，認真厲害。而一播出神曲《死性不改》時，台下不但跟着唱，就連Twins嘅經典獨白部分，觀眾都一字不漏地大聲講出，畫面嘅震憾又搞笑！完全重現了當年集體回憶的名場面。

事後Kenny都忍唔住分享感受，「今次係我第一次嚟Cantonpop Party，之前一直聽講過『節拍星期五』好Hit，但係工作忙冇時間嚟。最近佢哋知我就嚟開演唱會，就整咗個Kenny Medley，咁點可以唔嚟玩吓？」講到Party感受，Kenny笑言：「哈哈！但見到大家聽到廣東歌咁興奮，每一首都跟住唱、跟住跳，真係好開心，證明大家真係好鍾意廣東歌！」

Kenny更爆料話：「我一上台，主腦人波盛就叫我啟動個Medley儀式，音樂一Play，全場就跟住唱，之後大家High到要求Encore，最後Encore咗《死性不改》同《La La世界》全首！之後佢哋播其他廣東歌，好似《活著Viva》、Twins嘅歌，成個晚好似變咗大型K房，大家都好有共鳴！」