193贈Lolly Talk月餅　打回頭反被屈縮沙唔送

上星期，女團Lolly Talk因傳出金主財困閂水喉，不單令全員半年來冇糧出，更被通知每人倒欠公司20萬元，而且日後去向未明。雖然八位成員隨後都出post，預告月底會有團隊活動，但大有可能是最後一次齊人同大家見面。一波未平，一波又起，事源ERROR成員郭嘉駿（193），自家品牌今年出月餅，亦已安排贈數盒予「最近有新聞的女團」，明顯是指Lolly Talk，意想不到是月餅被打回頭之餘，仲反被對方經理人屈因為女團有負面新聞，故縮沙抽起唔送。

193日前在社交平台發文分享一件「黐線」事，話說今年自家品牌推出月餅，亦禮貌地預備好一定數量贈予圈中友好，其中一份就寄到去Lolly Talk所屬的公司地址，但不知為何，速遞員嘗試兩次送貨，都冇人接收於是只好將月餅打回頭。正當以為對方事忙無閒處理時，193卻收到消息，指對方一名女性經理人作故仔，屈193因為女團近日的負面消息，決定收回月餅。

193在文中說︰「佢哋一位女性經理人同佢旗下嘅成員講，話打咗電話去問，確認咗我哋係因為佢哋嘅負面新聞而收返啲月餅。」193得悉後深表不滿，立即公開追問︰「究竟佢係打俾邊個問呢？佢冇問過我，亦都冇問過我同事，唔通係速遞員答佢？？？咁我係唔係應該投訴間速遞公司？我依家真係摸不著頭腦，呢個世界真係有咁多黐線嘅人，定係有人習慣性講大話，抑或呢個世界真係好多誤會呢？」

193更趁機開出一個投票活動，希望大家幫手研究下，到底這件事上，是位女性經理人講大話？速遞員講大話？或是193講大話。不過該帖文亦已刪除。