陳柏霖新片全廣東話對白　余香凝澄清被誤解呻冇Job

影后余香凝（Jennifer）、台灣男神陳柏霖、太保及小演員羅莃荋等晚上（11日）於主題樂園為電影《女兒²》進行拍攝。故事講述由陳柏霖、余香凝與羅莃荋組成的一家三口，經歷家庭創傷後，試圖重拾關係的溫情故事。近年多次演人母的Jennifer，笑指已兒女滿天下，不過每次所演故事也有不同，坦言今次故事相對沉重，戲中面對女兒離世的傷痛，喊戲不少：「好多時第二朝瞓醒都眼腫腫。」

陳柏霖也坦言今次是他從影以來最多喊戲的一次，亦透露自己全程以廣東話對白演繹：「好耐冇講廣東話，差唔多10幾年，日日練。」他笑指很多時會發音不準而鬧出笑話，可幸未至於不慎爆粗，又指首次演父親角色是一個特別體驗，不過戲中很早便痛失女兒，其後女兒會以AI方式出現，因此湊女玩耍戲份不多，但大讚演女兒的小羅莃荋很可愛，不時古靈精怪，問到可有令他想當真正父親生個自己骨肉？他笑謂：「拍完先講，哈哈！（有傳你年尾結婚？）有好消息會同你哋講。（本身都打算將來做爸爸？）會呀，睇Jennifer好幸福呀！」Jennifer表示柏霖每天都會關心她開工前跟小朋友做過甚麼，笑指或因見她面露疲態，又大爆男神魅力沒法擋，就連小演員羅莃荋也被迷倒：「佢同我講話好羨慕戲入面有個咁靚仔爸爸，話真係好啦，戲入面爸爸咁高咁靚仔，哈哈！」她指雖然拍攝氣氛沉重，但現場亦有溫馨一面。

Jennifer除了感謝導演邀請，更感謝藝術總監夏永康為她設計一個新全造型，很有新鮮感：「好多人睇到都話後生咗，逆齡呀！唔係點企佢（陳柏霖）隔籬，佢個樣咁細個。（老公有冇讚？）佢鍾意長頭髮，不過都話好後生，好有新鮮感，哈哈！」另談到早前有報道指她向友人呻工作量少，她坦言本來不想回應太多，解釋當日才剛完成工作，跟經理人一起去吃雪糕，但卻被誤解在抱怨沒工作，她説：「唔緊要，拍攝完有作品出嚟畀大家見到，大家都會明白我有積極工作，同埋真係想講我哋都經歷緊一個艱難嘅時刻，有好多同行，幕前幕後都未必有咁多工作機會，甚至要做其他工作去幫補生活，所以好感恩今次有戲開，感恩一路以嚟嘅工作機會，希望前景愈嚟愈好，始終大家最熱愛係電影。」她坦言入行多年，已練成一個良好心態，對這些報道會一笑置之，又笑指近來每次演出也獲配男神演老公，已經非常感恩，亦透露有意挑戰幕後工作當編劇。陳柏霖也表示工作量Ok，笑言很忙，提到他早前於台的活動上巧遇姜濤，他説：「佢好多Fans呀！（有機會合作？）部戲香港上畫會邀請佢睇。」

至於戲中演柏霖父親的太保，透露戲中也有一場感人喊戲，不過未有Jennifer般厲害哭到眼腫，問到對兩位新一代演員評價，他説：「同柏霖10幾年前合作過，佢依家當然成熟好多，余香凝第一次合作，佢哋演繹方式非常到位，非常好！（有冇提點後輩？）唔需要，一個影后，陳柏霖亦拍好多戲，最緊要我哋每場戲大家都有互動同默契。」他坦言最難忘跟戲中孫女的傷感戲份，另笑指是首次來主題公園的水族館，看到大魚缸覺得很驚訝，透露平日不用工作最愛留家煮兩味，最擅長是蒸魚。談到工作大計，他透露正跟內地洽談電影工作，稍後或會跟台灣片合作監製殭屍片：「好耐之前拍咗部《殭屍》都幾好睇吖，合作方話好似冇人喺台灣拍過殭屍片，台灣有冇殭屍呢？」他透露故事會融入當地文化，屬意找香港和台灣演員演出，坦言雖然市益不明朗，投資者或會擔心未能回本而卻步，但自己相對樂觀：「香港人嘅精神好犀利，一段時間就會返番嚟，我幾睇好香港！」

東網網站 : https://on.cc/東網Facebook專頁 : https://www.facebook.com/onccnews/