跑步與人：Siu Chun

1. 跑步年資？為什麼開始跑步？

今年已經係我跑步第15年。人生過半時間都係跑步成長。當中有13年主力參與短跑100米、200米賽事。自細鍾意運動，好鍾意同其他小朋友一齊玩hide and seek同走嚟走去。最初純粹係因為貪玩，見到香港站有條好直長嘅電梯就係上面跑步。跑完覺得好好玩，呀哥又覺得我跑得幾快，所以就叫我開始學田徑。

2. 有沒有跟跑會或教練跑？選擇原因？

中三時短跑經暑期訓練班有幸跟到南華會文叔學習短跑技巧、跑姿以及如何為自己設計訓練。後來機緣巧合下跟公民黎子樑和余顯華教練操練。

大學畢業後曾經有一年時間跟過TPH，希望學習跑山技巧減少受傷。現時間中會參與Wazup Running Club。我喜歡WRC家的感覺，輕鬆快樂地跑步，以及與跑步朋友聚會食飯。

3. 最喜歡的跑步用品品牌？最喜歡一對跑鞋？

我係Multi brand user，朋友都會笑我全身都唔同Brand, 因為自己覺得每個品牌都有佢最叻最有特色嘅部份。我會選擇靚同最岩自己，最舒服嘅product。暫時最鍾意嘅兩對跑鞋都嚟自HOKA，分別係陪我走過初馬嘅HOKA Mach 5 ；同陪我走過人生第一個100公里賽事嘅HOKA Speedgoat 5。

4. 喜歡跑山還是路跑？路跑跟山跑有什麼不同感受？

兩個都鍾意但比較之下，我鍾意跑山多啲。我會形容跑山嘅時候就好似一隻精靈係山林穿梭自由自在，我好鍾意同大自然連繫嘅感覺，加上跑山路段更有挑戰性更好玩。感覺上，路跑容許自己有更多嘅空間思考，而跑山則偏向放空狀態。因為跑山需要高度專注，一諗嘢就會好易撠親踢到石頭。

5. 最深刻的一場賽事？原因？

黃金百里。呢個係我完成嘅第一個100公里賽事。我用咗好長時間去完成，但係其實對我嚟講好似眨吓眼就過咗。好感恩自己有機會參與呢次比賽。見住每一公里累積，比賽中認識到唔同師兄師姐，一齊傾計一齊走，帶比到我好多啟發；CP義工對我地照顧有加；到後期夜媽媽凍冰冰自己一個上針草帽，好眼瞓又出現幻覺，見到一直有一對情侶跟住我，望番後又唔見咗，而家都未肯定自己係咪撞鬼！再到天開始光上到大帽山咁啱撞到呀哥操山；之後四排石山懷疑人生以為自己去咗異世界，到諗住好型咁跑去終點，點知去到終點第一件事係好似小朋友咁喊。好記得義工姐姐問我「係咪太辛苦啦？」我喊住答佢「係超辛苦」…

呢一點一滴諗番都覺得好笑。我知一切都唔係咁容易就可以經歷到。每次比賽都覺得好感恩，因為你只需要一直跑，身邊總有人支持你照顧你。山係好多人嘅家。

6. 最想到外國哪裏跑馬拉松/山賽？

我最想去法國、瑞士和意大利跑UTMB。踏上藍地氈都係好多跑山選手嘅夢想。所以我應承咗自己，當自己有能力跑UTMB嘅時候先會去呢幾個國家。7.日常跑步路線？喜歡什麼時段跑步（早跑/晚跑）？為什麼？

日常都係落街跑堅尼地城海旁為主。我會05:30起身落街跑先開始每一日嘅工作。依家天氣熱，所以夜晚跑都係唔錯跑選擇。之前操練最鍾意去衛徑一段同金督馳馬徑。因為基本上你想練攀升、樓梯、平路/Hill Repeat呢啲訓練都做到。

8. 除了跑步，有沒有做交叉訓練？（例如舉重/游泳/瑜伽）對跑步有沒有幫助？

有呀，我會做gym、游水、打波。我自己認為cross training 絕對有幫助，因為每項運動都係用緊唔同嘅肌肉，令肌肉更有靈活性，活動更敏捷。

9. 現在或過往有沒有跑步傷患？如何處理？

基本上個個跑山嘅人都由頭傷到腳趾尾。我自己最大嘅傷患應該係港百嘅時候斷左十字韌帶。我冇做到手術，但花咗好4，5個月時間，透過物理治療紓緩痛楚；以及重訓強化肌肉同另一組韌帶，由跑山轉為路跑，傷後3個月由零慢慢跑番上去，再用短距離嘅山賽試腳。

10. 現時跑步目標是什麼？

今年年尾會同跑友一齊去清邁比賽，係相隔一年多既超馬。下年一月希望有得參加HK100儲石仔；之後就會籌備自己4月會去跑撒哈拉沙漠265公里。暫時計劃到四月。

11. 跑步對你工作/人生有沒有幫助/改變？

跑步提醒我要保持最佳狀態，除咗要持續訓練，都要有充足休息。人係有無限嘅可能，勇敢地追夢。”Remember you are braver than you think, Stronger than you believe.” Do less, make wise decisions；Keep Running, and run on your own pace。成功源自不斷失敗，要進步先要跌倒。

12. 有什麼社交媒體可以找到你？
IG:@siuchunnn
FB: Chan Siu Chun

Please follow Insports Hub on Facebook & Instagram
https://insportslab.com/
FB
https://www.facebook.com/insportslab
IG
https://www.instagram.com/insportslab/