香港美食：【日本牛肉飯專門店松屋第三間分店登陸旺角！位置極方便即睇新店地址！】

更新於 05月28日16:51 • 發布於 05月28日08:51 • 香港人遊香港

松屋｜日本牛肉飯專門店松屋第三間分店登陸旺角！

日本三大牛肉飯連鎖店「松屋」第3間香港分店將於2025年6月強勢進駐旺角！呢間位處旺角中心地帶嘅分店，絕對係超級明智嘅選址，已經有唔少網民大讚呢個位置一流，更有人預測呢間分店有機會成為松屋香港人流最旺嘅分店之一呀！松屋由1966年創立至今，一直以抵食價錢同多元化菜單受到歡迎。香港區第一間分店喺佐敦開業，之後再喺深水埗開第二間，而家佐敦分店仲已經升級做24小時營業添，任何時間都可以食到佢哋嘅招牌牛肉飯同其他日式丼飯！至於旺角新店嘅確實開幕日期同營業時間，就要視乎工程進度而定喇！官方會適時公布最新消息，大家密切留意啦！準備好迎接松屋旺角店未呀？

▲ 松屋自1966年成立以嚟，已經成為日本三大牛肉飯品牌之一，同吉野家同すき家（Sukiya）齊齊並駕齊驅，喺日本全國擁有超過1,200間分店，早前衝出海外市場登陸香港。

▲ 松屋最出名就係提供抵食又好味嘅日式牛肉飯，招牌菜包括傳統牛肉飯、香蔥温泉蛋牛肉飯、燒牛五花定食，仲有韓式燒豬五花飯同芝士咖喱飯等等，款款都係回頭客至愛。

▲ 松屋喺香港嘅第一間分店於2024年8月登陸佐敦，間舖有超過3,000平方呎大，可以容納45個座位左右。正嘅係佢哋嘅價格非常親民，招牌牛肉飯中份只係35蚊，其他定食同咖喱飯都只係35至69蚊之間，平靚正三樣齊！

▲ 旺角新店正在籌備中，各位牛肉飯控記得密切留意啦！想一嘗正宗日式牛肉飯，唔使坐飛機去日本啦松屋！