黃淑蔓尖沙咀商場疑被非禮　望途人求救：竟然冇人理我

現年24歲的黃淑蔓（Feanna）最近忙於宣傳新歌《梗頸四》和參與School Tour，昨日（10月30日）她在社交平台出帖文，表示在尖沙咀某商場疑被非禮，「俾人撞咗下，膊頭同大髀都俾人hi咗」，而最她最不開心是「我停咗喺度望我後面經過嘅人求救，竟然冇人理我」。帖文一出後，有不少網民留言有類似經歷，Feanna今日再留言回覆，「而家心情已經平復返開心返~出post都係為咗提醒各位要注意」。

黃淑蔓在社交平台分享兩張在尖沙咀某商場拍下疑似涉事人士的照片，寫道：「喺tst行行吓，突然之間俾人撞咗下，膊頭同大髀都俾人hi咗，第一下反應唔切，淨係覺得好驚，呢個人撞完我之後即刻瞄住前面另一個女仔想撞埋去，我實在係太驚啦當刻，自己一個人唔知應該點做好，所以我決定遠離，最唔開心嘅係我停咗喺度望我後面經過嘅人求救，竟然冇人理我，各位女生行街嘅時候要小心，我今日已經係長袖衫長牛仔褲帶住頂帽帶住個口罩，真係好無助。」

黃淑蔓今日留言回覆：「收到好多DM都同我講有遇過呢一位男士，佢經常攞住好多野（嘢）（eg 紅白藍膠袋）同埋會帶（戴）住耳機，會喺你身後趁你唔注意嘅時候撞埋嚟。我就喺冇玩手機冇帶（戴）耳機嘅情況之下都俾佢突襲到，各位小心啦，我而家心情已經平復返開心返~出post都係為咗提醒各位要注意，多謝大家好多好溫暖嘅message。」