李芷晴《女神》拒愛惹負評　出文讚Jacob優秀：多謝你理解

TVB戀綜節目《女神配對計劃》於上周日（9月14日）大結局，當中有人歡喜有人愁，葉蒨文（Sophie）、梁敏巧（Maggie）、羅毓儀（Yuki）配對成功，而李芷晴（Stephanie）與關嘉敏（Carman）則選擇單身。李芷晴在節目中與林焌堯（Jacob）的相處愈來愈好，但最後仍然選擇維持單身，此舉竟惹起不少網民反感，批評她「收兵」，令她飽受負評困擾。李芷晴在社交平台撰寫千字文剖白心聲，大讚Jacob「係一個非常之優秀嘅男仔，呢段時間我真係睇到你為我嘅付出同進步，相信所有人都有目共睹，非常感謝你，亦都好多謝你嘅理解。」而Jacob在Step的帖文下留言：「尊重你嘅決定，希望你幸福」，而Step亦回覆：「多謝你嘅理解同尊重，我都希望你會幸福」。

李芷晴在社交平台就《女神配對計劃》撰寫長文，寫道：「女神配對計劃圓滿結束，真係好感恩可以參與呢一個節目，當中遇到好多好多天使。感謝節目組每一位，無你哋無呢個節目，佢哋真係唔瞓覺絞盡腦汁費盡心思嘔心瀝血先至有呢一個咁好睇嘅作品。感謝為我哋梳頭化妝嘅所有幕後團隊、感謝四位共同進退嘅女神、感謝參與過節目嘅咁多位男嘉賓，無論你哋選擇邊位，好感謝你哋嘅勇氣同付岀！特別係我果組嘅組員Issac、Jaden、阿胡、Kenneth、Jacob你哋每一位都係非常優秀，多謝你哋陪我走過呢一段旅程。」

Step表示想認真發展一段關係：「女神配對計劃呢段旅程，就好似上咗一堂戀愛課堂。每次拍攝都比以前更加了解自己，亦都反思咗好多自己嘅問題。以前嘅我好容易投入戀愛，但拍攝過程發現，原來以往嘅感情經歷，加上年紀問題，開展一段新嘅感情變成好重要好沉重嘅決定，因為以往嘅唔成功，我習慣將自己嘅價值放喺其他人嘅身上，甚至乎變得懷疑自己、唔再愛自己。但我依然相信愛情，真係好想認真發展一段關係，所以變得更謹慎。如果自己問題未解決，就去開展一段新嘅關係嘅話，我相信呢段關係唔會長久，亦對大家都唔公平。」

Step大讚Jacob非常優秀：「過去嘅我係一個好怕做決定嘅人，因為做決定就代表要負上責任，成日對自己嘅決定會好猶豫冇信心，所以有時遇到問題會選擇逃避，又或者將個選擇權交俾其他人。拒絕一個人並唔係一個咁易嘅決定，拍攝當日我都好緊張、非常掙扎，搵左好多人去傾，有我哋嘅監製Manho、Bob爸爸、跟住我哋全程嘅writer Esther、同埋我嘅閨蜜團Honey、Karlie、波波，好感謝有你哋嘅意見同支持，我先勇於做到呢個決定。想同Jacob講，你係一個非常之優秀嘅男仔，呢段時間我真係睇到你為我嘅付出同進步，相信所有人都有目共睹，非常感謝你，亦都好多謝你嘅理解。」

Step依然期待愛情的到來：「喺節目上最後無選擇任何人呢一個決定絕對同所有男仔嘅條件無關。愛情唔係一份清單，唔係邊個符合嘅條件更多就選擇邊個，而係遇見一個特定嘅靈魂，然後發現成個世界因此而變得唔同。當我準備好嘅時候，我依然期待愛情嘅到來。最後，若果大家喺感情路上、甚至乎係人生上遇到任何問題覺得好掙扎嘅時候，希望大家可以望清楚自己內心嘅想法，相信自己，勇於去做心入面嘅抉擇，咁就係當下最好嘅答案。多謝呢個節目令我成長，感恩有大家」。